Тошкент вилояти Чирчиқ шаҳрида 31 январь куни номаълум шахслар эркакни болға билан уриб, унинг уйидан пулларини олиб қочди. Бу ҳақда Тергов департаменти ахборот хизмати хабар берди.
Қайд этилишича, 3 нафар номаълум шахс Чирчиқ шаҳри 3-кичик ноҳияда жойлашган деҳқон бозори ёнидаги спиртли ичимликлар дўконида спиртли ичимлик истеъмол қилиб ўтирган 49 ёшли Т.А.нинг олдига келган.
Улар эркакка ўзини мусофир сифатида таништириб, егулик учун бирор-бир нарса беришини илтимос қилган. Т.А. уларни ўзининг яшаш хонадонига олиб бориб, улар билан биргаликда спиртли ичимлик истеъмол қилиб ўтирган вақтида 2 киши хонадондаги ёғочдан бўлган жавон устида турган металл болға билан унга ҳужум қилган.
Шундан сўнг қимматли нарсалар ва пулларини беришини талаб қилиб, Т.А.ни ўлдириш билан қўрқитиб, унинг орқа бел соҳасига қўлида бўлган металл болға билан бир маротаба зарба берилган, кейин юз қисми ва танасининг турли жойларига уриб-тепиб, тан жароҳати етказилган. Улар хонадондан 8 миллион 310 минг сўмлик маиший техника ва 2 минг доллар миқдоридаги пулларни босқинчилик йўли билан қўлга киритиб, ҳодиса бўлган жойидан яширинган.
Олиб борилган тергов-тезкор ҳаракатлар натижасида мазкур жиноятни 24 ёшли С.М., А.А. ва 22 ёшли Х.А.лар содир қилганликлари аниқланиб, улардан жабрланувчига тегишли бўлган телевизор ашёвий далил тариқасида расмийлаштириб олинган. Мазкур ҳолат юзасидан Жиноят кодексининг 164-моддаси 2-қисми “а,б,в” бандлари (босқинчилик) билан жиноят иши қўзғатилиб, гумонланувчилар процессуал тартибида ушланган. Ҳозирда тергов ҳаракатлари олиб борилмоқда.
Изоҳ (0)