“Андархон” — Фарғона вилоятининг Бешариқ туманида жойлашган маҳалла бўлиб, мазкур маҳалла фуқаролар йиғинида 850 дан зиёд хонадон мавжуд. Мазкур ҳудудда яшовчи аҳоли вакиллари полиз маҳсулотлари етиштириш билан шуғулланади. Андархонликлар етиштирган қовун бир йиллаб сақланади. “Дарё” мухбири тилими тилни ёрар қовунларнинг узоқ сақланиш сирлари билан қизиқди.
Маҳалла аҳолисининг аксарияти қовун, тарвуз ва бошқа полиз маҳсулотлари етиштириш билан шуғулланади. Улар, асосан, Жиззах ва Сирдарё вилоятларида деҳқончилик қилади.
Андархонликлар етиштирган қовунлар ширин ва хуштаъмлиги билан нафақат Фарғона водийсида, балки Ўзбекистоннинг барча вилоятларида донг таратган.
Андархон қовунлари қўшни Тожикистон, Қозоғистон, Қирғизистон ва Россияга ҳам етказиб берилади. Андархонлик миришкорлар қовун етиштириш орқали гектаридан ўртача 20-30 миллион сўм даромад олади.
Андархонликлар қадимдан қовун сақлаш сирларини ҳам яхши ўзлаштирган. Хонадонлардаги махсус жойларда қовунлар ҳатто май ойигача сақланади.
Қишлоқдаги Шариповлар оиласи ҳам қовун етиштириш ва сақлаш ҳадисини олган. Хонадон вакиллари бир йилда 1 гектар ердан сарф-ҳаражатлардан ташқари 20 миллион сўмдан ортиқ даромад кўтаради.
Апрель–май ойларида экилган қовунлар сентябрь–октябрь ойларида узиб олинади. Катта-кичиклигига қараб сараланган қовунлар қовға билан боғланади. Шундан сўнг махсус омборхоналарга октябрь ойида териб қўйилган қовунлар кейинги йилнинг май ойигача табиий ҳолда сақланади.
Қовун сақлаш учун мўлжалланган омборхоналарнинг томи ва деворларида кичик туйнуклар қолдирилади. Бу туйнуклар омборхонада ҳавони мўтадил ушлаб туришга ва қовунларни узоқ вақт сақлашга ёрдам беради.
Қовунларни узоқ вақт сақлашда қишлоқ ҳудудининг географик жойлашуви ҳам муҳим аҳамиятга эга. Ҳудуднинг ўзига хос шамоли бўрикалла, қирқма, умрбоқий, кампиртўн каби қовун навларини палакдан янги узилгандек сақлаш имконини беради.
Изоҳ (0)