Toshkent viloyati Chirchiq shahrida 31-yanvar kuni noma’lum shaxslar erkakni bolg‘a bilan urib, uning uyidan pullarini olib qochdi. Bu haqda Tergov departamenti axborot xizmati xabar berdi.
Qayd etilishicha, 3 nafar noma’lum shaxs Chirchiq shahri 3-kichik nohiyada joylashgan dehqon bozori yonidagi spirtli ichimliklar do‘konida spirtli ichimlik iste’mol qilib o‘tirgan 49 yoshli T.A.ning oldiga kelgan.
Ular erkakka o‘zini musofir sifatida tanishtirib, yegulik uchun biror-bir narsa berishini iltimos qilgan. T.A. ularni o‘zining yashash xonadoniga olib borib, ular bilan birgalikda spirtli ichimlik iste’mol qilib o‘tirgan vaqtida 2 kishi xonadondagi yog‘ochdan bo‘lgan javon ustida turgan metall bolg‘a bilan unga hujum qilgan.
Shundan so‘ng qimmatli narsalar va pullarini berishini talab qilib, T.A.ni o‘ldirish bilan qo‘rqitib, uning orqa bel sohasiga qo‘lida bo‘lgan metall bolg‘a bilan bir marotaba zarba berilgan, keyin yuz qismi va tanasining turli joylariga urib-tepib, tan jarohati yetkazilgan. Ular xonadondan 8 million 310 ming so‘mlik maishiy texnika va 2 ming dollar miqdoridagi pullarni bosqinchilik yo‘li bilan qo‘lga kiritib, hodisa bo‘lgan joyidan yashiringan.
Olib borilgan tergov-tezkor harakatlar natijasida mazkur jinoyatni 24 yoshli S.M., A.A. va 22 yoshli X.A.lar sodir qilganliklari aniqlanib, ulardan jabrlanuvchiga tegishli bo‘lgan televizor ashyoviy dalil tariqasida rasmiylashtirib olingan. Mazkur holat yuzasidan Jinoyat kodeksining 164-moddasi 2-qismi “a,b,v” bandlari (bosqinchilik) bilan jinoyat ishi qo‘zg‘atilib, gumonlanuvchilar protsessual tartibida ushlangan. Hozirda tergov harakatlari olib borilmoqda.
Izoh (0)