Ўзбекистонда январь ойида кузатилган аномал совуқ аксар тадбиркорлик субъектларининг фаолиятига салбий таъсир кўрсатди. Шуни ҳисобга олган ҳолда, президент Шавкат Мирзиёевнинг “Ҳаво ҳарорати кескин совиб кетишининг иқтисодиётга салбий таъсирини камайтириш учун тадбиркорлик субъектларини қўллаб-қувватлаш чора-тадбирлари тўғрисида”ги қарори қабул қилинди. Мазкур қарор билан тадбиркорларга бир қатор енгилликлар берилмоқда. Шулар жумласидан солиқ имтиёзлари ҳам ўрин олган.
Солиқ қўмитаси бош инспектори Беҳзод Жалилов президент қарорида қайд этилган имтиёзлар ҳақида тушунтириш берди:
Тадбиркорлик субъектларининг 2023 йил 1 январга нисбатан 1 февраль ҳолатига ошган, яъни ҳосил бўлган солиқ қарзини 2023 йил 1 мартдан 1 июлга қадар фоизларсиз, қўшимча шартларсиз ва таъминот талаб этмасдан, тенг улушларда бўлиб-бўлиб тўлаш мумкин бўлади.
Мисол учун, А корхонанинг 2023 йил 1 январь ҳолатига 100 млн сўм солиқ қарзи 1 февраль ҳолатига 170 млн сўмни ташкил қилганда, бунда январь ойида ҳосил бўлган 70 млн сўм солиқ қарзини 1 мартдан 1 июлга қадар тенг улушларда тўлаш имконияти берилади.
Бунда тадбиркорлик субъектларига солиқ қарзини бўлиб-бўлиб тўлаш имкониятини бериш тўғрисида аризалар Солиқ қўмитаси томонидан 5 кун муддатда кўриб чиқилади ва ҳаво ҳароратининг кескин совиб кетиши даврида тўлиқ қувватда ишлай олмаган солиқ тўловчиларнинг январь ойи якуни бўйича ҳосил бўлган солиқ қарзини ҳам бўлиб-бўлиб тўлаш мумкин.
Шунингдек, ушбу қарор кучга кирган санадан бошлаб 2023 йил 1 апрелга қадар тадбиркорлик субъектларининг солиқ қарзига пеня ҳисобланмайди.
Ташқи савдо операциялари бўйича муддати ўтган дебитор қарздорлик учун хўжалик юритувчи субъектларга жарималар қўлланиши, шунингдек, мазкур қарор кучга киргунига қадар қўлланган жарималар ундирилиши 2023 йил 1 апрелга қадар тўхтатиб турилади.
Изоҳ (0)