Президент: “2023 йили Наманганда аҳолини даромадли иш билан таъминлаш мақсадида 45 млрд сўм субсидия маблағлари берилади”

Айни вақтда президент Шавкат Мирзиёев Наманган шаҳрида бизнес вакиллари, тадбиркорлар билан мулоқот ўтказмоқда. Бу ҳақда “Дарё” мухбири хабар берди. 

Президент куни кеча имзолаган қарорида Наманган вилоятида оилавий тадбиркорлик учун 2023 йили 950 миллиард сўм ёки 2 баравар кўп имтиёзли кредитлар ажратилади.

“Шунингдек, аҳолини даромадли иш билан таъминлаш мақсадида, 45 миллиард сўм субсидия маблағлари берилади. Шу билан бирга, бу йилдан энг оғир туманлар алоҳида тоифаларга ажратилди. Наманган вилоятида Мингбулоқ 5-тоифага, Норин тумани 4-тоифага кирган. 

Улардаги тадбиркорларга солиқ тўлаш, кредит ва кафолат олиш, давлат божларини тўлашда катта енгилликлар берилди. Марҳамат, тадбиркорлар бу имкониятлардан фойдаланиб, шу туманларда ўз лойиҳаларини бошлаши учун барча шароитларни яратиб берамиз.

Бу туманларга банклар ҳам бириктирилди (Мингбулоққа – Микрокредитбанк, Норинга – Халқ банки ва Хамкорбанк). Улар тадбиркорлар лойиҳаларига кўмакчи бўлади”, — деди президент.

Шавкат Мирзиёев 2023 йили вилоятда махсус текстиль зонаси ташкил этилиши ҳамда 15 та саноат зонаси инфратузилмасига 75 миллиард сўм ажратилиши ҳақида гапирди.

Шунингдек, аҳолига деҳқончилик учун тарқатиладиган 9,5 минг гектар ер (сўнгги икки йилда 8 минг гектар берилган) қўшимча имконият яратилади. Ушбу деҳқон ва тадбиркорлар ўз маҳсулотига бозор топиши учун, Наманганда 1 сентябрга қадар 15 та йирик савдо мажмуаси, деҳқон бозори ва “эко бозор” ишга туширилади.

“Лекин, уларнинг барчасидан ҳам самарали фойдаланилаяпти, деб бўлмайди. Очиқ айтиш керак, айрим туман ва шаҳар ҳокимлари, сектор раҳбарлари масалани ичига кирмаган”, — деди давлат раҳбари.