Ayni vaqtda prezident Shavkat Mirziyoyev Namangan shahrida biznes vakillari, tadbirkorlar bilan muloqot oʻtkazmoqda. Bu haqda “Daryo” muxbiri xabar berdi.
Prezident kuni kecha imzolagan qarorida Namangan viloyatida oilaviy tadbirkorlik uchun 2023-yili 950 milliard soʻm yoki 2 baravar koʻp imtiyozli kreditlar ajratiladi.
“Shuningdek, aholini daromadli ish bilan taʼminlash maqsadida, 45 milliard soʻm subsidiya mablagʻlari beriladi. Shu bilan birga, bu yildan eng ogʻir tumanlar alohida toifalarga ajratildi. Namangan viloyatida Mingbuloq 5-toifaga, Norin tumani 4-toifaga kirgan.
Ulardagi tadbirkorlarga soliq toʻlash, kredit va kafolat olish, davlat bojlarini toʻlashda katta yengilliklar berildi. Marhamat, tadbirkorlar bu imkoniyatlardan foydalanib, shu tumanlarda oʻz loyihalarini boshlashi uchun barcha sharoitlarni yaratib beramiz.
Bu tumanlarga banklar ham biriktirildi (Mingbuloqqa – Mikrokreditbank, Noringa – Xalq banki va Xamkorbank). Ular tadbirkorlar loyihalariga koʻmakchi boʻladi”, — dedi prezident.
Shavkat Mirziyoyev 2023-yili viloyatda maxsus tekstil zonasi tashkil etilishi hamda 15 ta sanoat zonasi infratuzilmasiga 75 milliard soʻm ajratilishi haqida gapirdi.
Shuningdek, aholiga dehqonchilik uchun tarqatiladigan 9,5 ming gektar yer (soʻnggi ikki yilda 8 ming gektar berilgan) qoʻshimcha imkoniyat yaratiladi. Ushbu dehqon va tadbirkorlar oʻz mahsulotiga bozor topishi uchun, Namanganda 1-sentabrga qadar 15 ta yirik savdo majmuasi, dehqon bozori va “eko bozor” ishga tushiriladi.
“Lekin, ularning barchasidan ham samarali foydalanilayapti, deb boʻlmaydi. Ochiq aytish kerak, ayrim tuman va shahar hokimlari, sektor rahbarlari masalani ichiga kirmagan”, — dedi davlat rahbari.
Izoh (0)