Айни вақтда президент Шавкат Мирзиёев Наманган шаҳрида бизнес вакиллари, тадбиркорлар билан мулоқот ўтказмоқда. Бу ҳақда “Дарё” мухбири хабар берди.
Президент айтишича, келгусида саноат ва хизмат кўрсатишни тиклаш учун, республика бўйича кунига 80 миллион куб метр газ ва 126 миллион кило-ватт соат электр етказиб берилади (ҳозир – 70 миллион куб метр газ ва 120 миллион киловатт соат электр берилмоқда).
Бир ҳафта ичида газ қуйиш шахобчаларига кунлик 5 миллион куб метр газ етказиб берилади (ҳозир – 1 миллион куб метр).
Энергетика вазирлигига тадбиркорларга энергия ресурсларини етказишни кунлик назоратга олиб, муаммоларни жойида ҳал қилиб бориш топшириғи берилди.
“Бу борада яна бир масала – Андижон ва Фарғонада бўлган учрашувларда кўплаб тадбиркорлар электр ишлаб чиқаришни ўзи йўлга қўйиш, кичик қуёш станцияларни ва микроГЭСлар қуришга тайёрлигини билдирди. Бундай ташаббуси бор Наманган тадбиркорларини ҳам, албатта, қўллаб-қувватлаймиз”, — деди президент.
Шунингдек, қурилиш ва қурилиш материаллари тармоқларини тезроқ тиклаш учун, давлат инвестиция дастуридан 3 трлн сўмлик молиялаштириш шу ҳафтадан очилади.
Хусусан, Наманганда инфратузилмани яхшилашга бу йил 1,3 триллион сўм йўналтирилади. (Инвестиция дастурига – 515 миллиард сўм, Маҳаллалар инфратузилмаси дастури – 480 миллиард сўм) Шунингдек, “Очиқ бюджет” доирасида вилоятга 600 миллиард сўм ажратилади.
“Бу чоралар орқали, Наманганда биринчи чоракнинг ўзида камида 210 миллиард сўмлик қўшимча қиймат яратилади”, — деди давлат раҳбари.
Изоҳ (0)