Фото: Украинанинг Лвов вилоятида қозоқ диаспораси кўнгиллилари “бузилмас ўтов” ўрнатди. У қандай вазифани бажаради?

Украинанинг Лвов вилоятида ҳам қозоқ диаспораси кўнгиллилари “бузилмас ўтов” ўрнатди. Бу ҳақда вилоят маъмурияти хабар берди.

Бунгача бундай ўтов Буча, Киев ва Харковда пайдо бўлган. Ўтовга ҳар куни соат 09:00 дан 19:00 гача бепул ташриф буюриш мумкин. У ерга ташриф буюрувчилар исиниши, мобил қурилмаларни қувватлантириши, чой ичиши ва қозоқларнинг анъанавий таомлари — палов ва бўғирсоқ ейиши мумкин. Битта ўтовга 50 нафаргача одам сиғади.

“Ўтовда мактаб ўқувчилари учун маҳорат дарслари ҳам ўтказилади. Қозоқ халқи шундай йўл билан бизни қўллаб-қувватлашидан хурсандман”, — деди Қозоғистоннинг Ғарбий Украинадаги фахрий консули Галина Маслюк.

“Бузилмас ўтов” лойиҳаси Украина парламенти депутати, Қозоғистон билан парламентлараро дўстлик гуруҳи раҳбари Сергей Нагорняк, тадбиркор Даулет Нуржанов, Украинадаги қозоқ диаспораси вакиллари ташаббуси билан амалга оширилмоқда. Лойиҳа доирасида Украинада яна иккита ўтов очилиши режалаштирилган.

Мавзуга доир:

• Бучада Қозоғистоннинг “бузилмас ўтов”и ўрнатилди. Республика расмийлари бунинг ҳукуматга алоқаси йўқлигини айтиб, хусусий компаниялар ташаббуси деб атади
• Украинада қозоқ диаспораси кўнгиллилари Бучадан кейин Киев марказида ҳам “бузилмас ўтов” очди (видео)