Foto: Ukrainaning Lvov viloyatida qozoq diasporasi ko‘ngillilari “buzilmas o‘tov” o‘rnatdi. U qanday vazifani bajaradi?

Ukrainaning Lvov viloyatida ham qozoq diasporasi ko‘ngillilari “buzilmas o‘tov” o‘rnatdi. Bu haqda viloyat ma’muriyati xabar berdi.

Bungacha bunday o‘tov Bucha, Kiyev va Xarkovda paydo bo‘lgan. O‘tovga har kuni soat 09:00 dan 19:00 gacha bepul tashrif buyurish mumkin. U yerga tashrif buyuruvchilar isinishi, mobil qurilmalarni quvvatlantirishi, choy ichishi va qozoqlarning an’anaviy taomlari — palov va bo‘g‘irsoq yeyishi mumkin. Bitta o‘tovga 50 nafargacha odam sig‘adi.

“O‘tovda maktab o‘quvchilari uchun mahorat darslari ham o‘tkaziladi. Qozoq xalqi shunday yo‘l bilan bizni qo‘llab-quvvatlashidan xursandman”, — dedi Qozog‘istonning G‘arbiy Ukrainadagi faxriy konsuli Galina Maslyuk.

“Buzilmas o‘tov” loyihasi Ukraina parlamenti deputati, Qozog‘iston bilan parlamentlararo do‘stlik guruhi rahbari Sergey Nagornyak, tadbirkor Daulet Nurjanov, Ukrainadagi qozoq diasporasi vakillari tashabbusi bilan amalga oshirilmoqda. Loyiha doirasida Ukrainada yana ikkita o‘tov ochilishi rejalashtirilgan.

Mavzuga doir:

• Buchada Qozog‘istonning “buzilmas o‘tov”i o‘rnatildi. Respublika rasmiylari buning hukumatga aloqasi yo‘qligini aytib, xususiy kompaniyalar tashabbusi deb atadi
• Ukrainada qozoq diasporasi ko‘ngillilari Buchadan keyin Kiyev markazida ham “buzilmas o‘tov” ochdi (video)