Ukraina poytaxti Kiyevdagi Shevchenko bog‘ida “buzilmas o‘tov” — shaharda elektr ta’minoti uzilib qolganda odamlar isinishi, choy ichishi va uyali telefonlarini zaryadlab olishi mumkin bo‘lgan punkt ochildi.
O‘tovni o‘rnatish mahalliy qozoq diasporasining ko‘ngillilari tomonidan amalga oshirilmoqda. Rasmiy ravishda o‘tov 14-yanvar kuni ochiladi va Ukrainada qish ayozi tugaguncha ishlaydi.
6-yanvar kuni xuddi shunday o‘tov Kiyev viloyatining Bucha shahrida paydo bo‘lgandi — bu shaharda Rossiya istilosi paytida yuzlab tinch aholi halok bo‘lgan.
“Ukraine seychas” Telegram-kanalining muxbiri bilan suhbatda ko‘ngillilar ularning tashabbusi bilan Ukrainaning oltita shahrida — Bucha va Kiyevdan tashqari, Lvov, Odessa, Xarkov va Cherkassida ham “buzilmas o‘tov”lar paydo bo‘lishini aytdi.
Avvalroq Buchansk shahar kengashi vakillari Buchadagi o‘tov Qozog‘iston elchixonasi va Oliy Rada deputati Sergey Nagornyak ko‘magida ochilgani haqida xabar bergandi. Keyin Tashqi ishlar vazirligi rasmiy vakili Mariya Zaxarova Ostonadan respublikaning Buchada o‘tov o‘rnatishga aloqasi yo‘qligi haqida kafolat olganini ma’lum qilgandi. Shu bilan birga, u “muhokamalarga chek qo‘yish” uchun Qozog‘iston TIV ushbu mavzu bo‘yicha rasmiy izoh berishi maqsadga muvofiq bo‘lishini ta’kidladi.
Qozog‘iston Tashqi ishlar vazirligi vakili Aybek Smadiyarov qurilishni elchixona ishtirokisiz qozog‘istonlik homiylar moliyalashtirganini ma’lum qildi.
Izoh (0)