Ўзбекистонда 2022 йилда аҳолининг валюта айирбошлаш шохобчалари орқали сотган валюталари ҳажми 68 фоизга ўсди. Бу ҳақда Марказий банк раиси Мамаризо Нурмуродов ОАВ вакиллари билан ўтказилган матбуот анжуманида маълум қилди, дея хабар берди “Дарё” мухбири.
Мамаризо Нурмуродовнинг айтишича, ўтган йили республикага келиб тушган валюталар ҳажми сезиларли кўпайган.
“2022 йилда экспорт тушумлари ҳажми 2021 йилга нисбатан 28 фоизга ошди. Йил якуни бўйича мамлакатга кириб келган пул ўтказмалари 2,1 баравар ўсди ва қарийб 17 миллиард долларни ташкил этди. Бу пул ўтказмаларининг бир қисми кичик тадбиркорларнинг экспорти, қўшни давлатлар фуқароларининг пул ўтказмаларини Ўзбекистон орқали олиши билан боғлиқ. Шу билан бирга, аҳолининг валюта айирбошлашга йўналтирган пул маблағлари ҳажми ҳам сезиларли ортди. Яъни аҳолининг валюта айирбошлаш шохобчалари орқали сотган валюталари қарийб 68 фоизга кўпайди. Бу ўсиш иқтисодиётда ялпи истеъмолни оширувчи омиллардан бўлиб қолмоқда. Бунда банкларнинг аҳоли билан валюта хариди ва сотуви ўртасидаги ижобий тафовут 2,9 миллиард доллар миқдорида шаклланди. Бу 30 триллион сўм маблағлар муомалага пул чиқарилиши орқали ялпи талабни молиявий таъминлашга хизмат қилганини англатади”, — деди Марказий банк раҳбари.
Мамаризо Нурмуродовнинг қўшимча қилишича, 2022 йилда Ўзбекистонга валюта маблағлари кириб келиш ҳажми 32 фоизга ортди. Республикадан валюта чиқиб кетиши эса 22 фоизга ўсди.
“Бу чиқиб кетишдаги ўсиш импорт ҳажмларининг кўпайгани билан боғлиқ. Ушбу вазият алмашув курси барқарорлигига ҳам ўз таъсирини кўрсатди”, — деди у.
Изоҳ (0)