“Озиқ-овқат нархлари ўсиши билан боғлиқ инфляцион хатарлар қисқа муддатли характерга эга” – Мамаризо Нурмуродов

Ўзбекистонда кузатилаётган озиқ-овқат маҳсулотлари нархларининг ўсиши билан боғлиқ инфляцион хатарлар қисқа муддатли характерга эга. Бу ҳақда Марказий банк раиси Мамаризо Нурмуродов ОАВ вакиллари иштирокида ўтказилган матбуот анжуманида маълум қилди, дея хабар берди “Дарё” мухбири.

Мамаризо Нурмуродовнинг айтишича, аномал совуқ нархлар ошишига таъсир кўрсатди ва бу жараён узоқ вақтга чўзилмайди.

“Январь ойида аномал совуқ об-ҳаво туфайли таклиф билан боғлиқ қисқа муддатли хатарлар айрим турдаги маҳсулотларни ишлаб чиқариш ва етказиб бериш ҳажмларига таъсир кўрсатди. Хусусан, қишлоқ хўжалиги маҳсулотларини бозорларга етказиб бериш, бозорларда кундалик савдоларни ташкил қилиш борасида узилишлар ва камчиликлар мавжуд. Шунингдек, қўшни давлатларда ҳам айрим истеъмол товарларининг экспортига чекловлар киритилмоқда. Бу ҳам маълум жиҳатдан бугунги кундаги нарх-навонинг шаклланишига ва инфляцияга ўзининг таъсирини кўрсатувчи омиллардан ҳисобланади.

Ҳозирда асосий турдаги озиқ-овқат маҳсулотлари таклифи билан боғлиқ муаммоларни ҳал этиш бўйича ҳукумат томонидан тегишли чоралар кўрилмоқда. Биз ушбу вазият билан боғлиқ инфляцион хатарларни қисқа муддатли характерга эга деб ҳисобламоқдамиз. Яъни буни инфляцияга таъсирини январь ойида қисман сезишимиз мумкин ва кўриладиган чоралар келгуси ойларда нархларнинг барқарорлашувига олиб келади”, – деди Марказий банк раҳбари.

Аввалроқ Мамаризо Нурмуродов 2023 йилда Ўзбекистонда кутилаётган асосий инфляцион хатарларни санаб ўтганди. Улар қаторида таклиф билан боғлиқ инфляцион хатарлар ҳам мавжудлигини айтган.

“Масалан, метан гази узиб қўйилди. Бу ўз-ўзидан бензин тақчиллигини юзага келтирди. Биз нима хатарни кутяпмиз деганда, Марказий банк эртага газ “заправка”лари очиладиган бўлса, газ нархини кўтарилишидан хатаримиз бор”, – деган ташкилот расмийси.