Теҳрондаги Озарбайжон элчихонасига қуролли ҳужум уюштирилди, оқибатда дипломатик миссиянинг қўриқлаш хизмати раҳбари ҳалок бўлди. Озарбайжон Ташқи ишлар вазирлиги хабарига кўра, яна икки қўриқчи яраланган.
Вазирлик маълумотларига кўра, ҳужум Боку вақти билан 8:30 атрофида (Тошкент вақти билан 9:30) содир бўлган. Ҳужумчи Калашников автоматидан элчихонанинг қўриқлаш постига қарата ўқ узган. Ҳужум сабаблари ҳақида хабар берилмаган. Воқеа юзасидан суриштирув ишлари олиб борилмоқда.
Кейинроқ ҳужум лаҳзалари акс этган видео эълон қилинди. Қайд этилишича, ҳужумчи 50 ёшли Эрон фуқароси, у қўлга олинган.
2022 йилнинг октябрь ойида Озарбайжоннинг Вашингтондаги элчихонаси хизмат автомобили ўққа тутилганди. Шунингдек, август бошида Озарбайжоннинг Лондондаги элчихонасига ҳужум уюштирилган, ўшанда воқеани содир этишда диний радикаллар гумон қилинганди. Улар бино балконига чиқиб, диний байроқни ўрнатган ва шиорларни баралла айтган. Полиция аралашувидан кейин элчихонага ҳужум қилганлар қўлга олинган.
Изоҳ (0)