АҚШ ва Германия Украинага энг сўнгги русумдаги жанговар танкларни, Abrams ва Leopard, жўнатишга ваъда берди. Бу бир қанча европалик иттифоқчиларнинг Киевга танк етказиб беришига йўл очди, дея хабар берди Al Jazeera.
Президент Жо Байден ва канцлер Олаф Шольц баёнотига кўра, Вашингтон 31 та Abrams танкини, Берлин эса 14 та Леопард 2 танкини Украинага етказиб беради. Мазкур қарор Буюк Британия ўтган ҳафта 14 та Challenger 2 танкини Киевга етказиб беришга ваъда берганидан кейин эълон қилинди. Украина президенти Владимир Зеленский Россия ҳарбийларини Украина ҳудудидан сиқиб чиқаришда ёрдам бериш учун 300 та танк сўраган. Россия танклар етказилишига муносабат билдириб, улар “ёниб кетишини” маълум қилган.
Ҳозирда қуйидаги давлатлар Украинага танклар етказишга рози бўлди:
Германия
Украина ва Ғарб расмийларининг бир неча кунлик босимидан сўнг, Германия Украинага Leopard 2 жанговар танкларини етказиб беришини эълон қилди.
Канцлер Шольцнинг таъкидлашича, Германия дастлаб 14 та танк жўнатади ва бошқа мамлакатларга Украина учун Leopard 2 танкларини экспорт қилишга рухсат беради. Бу Европа бўйлаб қўшимча ҳарбий ёрдам учун катта тўсиқни олиб ташлайди.
Мақсад Германия ва унинг иттифоқчилари Украинага жами иккита баталон ёки 88 та танк бериш экани таъкидланди. Дунё бўйлаб 20 га яқин армия томонидан фойдаланиладиган Leopard’лар Украина учун энг яхши вариант ҳисобланди. Чунки улар механик жиҳатдан нисбатан камроқ мураккаб бўлиб, Украина кучларини ундан тезроқ фойдаланишга ўргатишда ёрдам беради.
Буюк Британия
Британия яқин ҳафталарда Украинага ўзининг 14 та Challenger 2 асосий жанговар танкларини, шунингдек, бошқа илғор артиллерия техникасини юборишга ваъда берди.
Challenger 2 Британия армиясида 1994 йилдан бери хизмат қилмоқда. Армия маълумотларига кўра, у Босния ва Герцоговина, Косово ва Ирoқда жойлаштирилган. 30 йилга яқин вақт мобайнида Viskers Defense Systems компанияси 500 та Challenger 2 ишлаб чиқарган.
Америка Қўшма Штатлари
АҚШ аввалги позициясини ўзгартирди ва Украинага ўзининг 31 та М1 Abrams жанговар танкини юборишини маълум қилди.
Байден бу дунёдаги “энг қобилиятли” танк эканини айтиб, Украинага ҳудудий яхлитлигини ҳимоя қилишда ёрдам беришини таъкидлади. АҚШ раҳбари Украинага танкларни етказиб бериш “вақт олишини” тан олди, бироқ Вашингтон бу вақтда украиналиклар аскарларни ундан фойдаланишга ўргатилишини билдирди.
Abrams танки Германияда ишлаб чиқарилган Leopard 2 га қараганда ёқилғи кўп кетиши ва мураккаб техникаси билан ажралиб туради.
Польша
Польша ҳам Украинага ўзининг 14 та Leopard 2 танкини юборишга тайёрлигини билдирди. 24 январь куни Польша ҳукумати немис ҳарбий техникасини Украинага бериш учун Германиядан рухсат сўраганини маълум қилди.
Польша бош вазири Maтeуш Моравески унинг ҳукумати Европа Иттифоқидан Киевга жўнатмоқчи бўлган танклари нархини қоплашни сўрашини айтди ва бу ҳаракатни “синов” деб атади.
Финляндия
Финляндия мудофаа вазири Микко Савола ҳам 25 январь куни Leopard 2 танкларини Украинага юборишни режалаштирганини билдирди.
“Украинага Leopard жўнатиш бўйича халқаро ҳамкорлик ҳозир ривожланмоқда ва Финляндия бунда иштирок этади”, деди Савола.
Россия билан чегарадош Финляндия Украинага қанча танк етказиб бериши ҳозирча аниқланмаган.
Норвегия
Польша ва Финляндия кетидан Норвегия ҳам Ғарб ҳарбий ёрдами доирасида Украинага Leopard 2 жанговар танкларини юборади.
“Норвегия Украинага жанговар танклар беришни қўллаб-қувватламоқда. Мамлакат бу жараёнда иштирок этади”, — деди Мудофаа вазири Бёрн Арилд Грам. У қанча техника юборилишига ойдинлик киритмаган.
Испания
Испания мудофаа вазири унинг мамлакати Украинага ўз захирасидан Leopard 2 танкларини беришга тайёр. Ҳукумат Украинага Россия босқинига қарши туришда ёрдам беришда бошқа Ғарб иттифоқчилари билан ҳамжиҳатликда ҳаракат қилишини таъкидлаган. Вазир Испания бериши мумкин бўлган танклар сони ҳақида ҳеч қандай изоҳ бермаган.
Нидерландия
Мамлакат бош вазири Марк Рутте Нидерландия Украинага жанговар танклар етказиб беришга тайёрлигини айтди.
“Агар Нидерландиянинг шу орқали Украинага ёрдам беришда ҳиссасини қўшса, биз бунга тайёрмиз”, — деди Рутте. У Нидерландия Германиядан ижарага олган танкларни сотиб олиб, Украинага бериши мумкинлигини таъкидлади.
Мавзуга доир: Германия ниҳоят Leopard танкларини Украинага юборишга рози бўлди
Фоторепортаж: Ғарб Украинага қандай қуролларни ваъда қилмоқда?
Изоҳ (0)