Берлиннинг Украинани Леопард билан таъминлаш қароридан сўнг россиялик хакерлар Германия давлат муассасаларига ҳужум қилмоқда. Бу ҳақда Германиянинг Ахборот хавфсизлиги федерал идорасига таяниб, Spiegel хабар берди.
Нашрнинг ёзишича, сўнгги бир неча соат ичида Россиянинг Killnet гуруҳи хакерлари Германиядаги бир қанча тиббиёт ва давлат муассасалари веб-сайтларига ҳужум қилиб, уларнинг ишини қисман тўхтатиб қўйган. Хакерлар Бундестаг веб-сайтини ишдан чиқарганини ҳам даъво қилди, аммо сайт ҳали ишлаб турибди.
Немис кибержиноятчиликка қарши кураш агентлигининг таъкидлашича, бузғунчилик муассасалар фаолиятига жиддий таъсир кўрсатмаган.
Аввалроқ Германия канцлери Олаф Шольц Германия ва иттифоқдош давлатлар Украинага жами 112 та Леопард 2 танкини бермоқчи эканини маълум қилганди. Бундан ташқари, янги ёрдам пакети таркибидан Украина ҳарбий хизматчиларини янги қуроллар билан ишлашга Германияда ўқитиш, логистика, ўқ-дорилар ва техник хизмат кўрсатиш кабилар жой олади.
Изоҳ (0)