АҚШ Молия вазирлиги “Вагнер” хусусий ҳарбий компаниясини трансмиллий жиноий ташкилот деб эълон қилди. Бу ҳақда вазирлик сайтида хабар берилди.
“ ‘Вагнер’ гуруҳига қарши бугунги кенгайтирилган санкциялар, шунингдек, уларнинг ҳамкорлари ва Россия ҳарбий комплексини ривожлантиришга ҳисса қўшаётган бошқа компанияларга нисбатан янги санкциялар Путиннинг ўз ҳарбий машинасини қуроллантириш ва жиҳозлаш имкониятларини янада чеклайди”, — деди АҚШ молия вазири Женет Еллен.
АҚШ молия вазирлиги, шунингдек, “Вагнер”га алоқадор бўлган Россия, Хитой, Люксембург ва Бирлашган Араб Амирликлари компанияларига ҳам санкциялар киритди. Хусусан, Хитойнинг Spacety China компанияси санкциялар остида қолди — АҚШ маълумотларига кўра, у Украинанинг сунъий йўлдошдан олинган суратларини “Вагнер”га сотган.
АҚШ Молия вазирлигининг санкциялар рўйхатига, жумладан, Россия саноат ва савдо вазирлиги раҳбари Денис Мантуров, Taтaристон раҳбари Рустам Минниханов ва Россия ҳарбий-саноат мажмуасининг бир қатор компаниялари киритилган.
CNN хабарига кўра, АҚШ давлат котиби Энтони Блинкен Украинадаги босқинга алоқадор россиялик 531 нафар ҳарбийга Америкага кириш учун виза чекловлари жорий этилишини айтган. Бундан ташқари, Давлат департаменти “Вагнер”га россиялик маҳбусларни урушда қатнашишга ёллашда ёрдам берган Россия Федерал Жазони ижро этиш хизматининг уч раҳбарига қарши санкциялар киритмоқчи.
20 январь куни Оқ уй матбуот котиби Жон Кирби АҚШ “Вагнер” гуруҳини трансмиллий жиноий ташкилот сифатида белгилашни режалаштираётгани ҳақида маълум қилганди. Гуруҳ раҳбари Евгений Пригожин АҚШ расмийларининг бу ниятига фикр билдирар экан, “Ва ниҳоят, энди ‘Вагнер’ ва америкаликлар — ҳамкасблар бўлди. Бундан буёғига ўзаро муносабатларимизни ‘жиноий уруғ-аймоқлар ўртасидаги можаро’ деб аташ мумкин” деди.
“Вагнер” жангчилари Украинадаги жанговар ҳаракатларда фаол иштирок этмоқда, улар расмий равишда РФ Мудофаа вазирлигига ҳисобот бермайди. Бундан ташқари, гуруҳ Африканинг турли мамлакатларида фаолият юритади.
Изоҳ (0)