“Дарё” нашри 26 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия қўшинлари ҳаво ҳужумларини кучайтирмоқда, украиналиклар ракеталардан қандай ҳимояланади?
Украина Қуролли кучлари Ҳарбий-ҳаво кучлари қўмондонлигининг маълум қилишича, Россия қўшинлари 26 январга ўтар кечаси Украинага 24 та “Shahed-136/131” камикадзе-дронлари билан ҳужум қилди. Дронларнинг барчаси уриб туширилди.
25 январь куни кечқурун Украинанинг кўплаб ҳудудларида ҳаво тревогаси янграганди. “UNIAN” маълумотларига кўра, учувчисиз учоқларнинг асосий қисми Запороже ва Днепрбўйи вилоятлари устида уриб туширилган.
Бугун Россия кучлари Киев йўналишида 15 та қанотли ракета учирди, ҳаво ҳужумидан мудофаа тизимлари уларнинг барчасини уриб туширди, деб хабар қилмоқда Киев ҳарбий маъмурияти раҳбари Сергей Popко.
Шаҳар Telegram каналларида маҳаллий аҳолининг ҳужумдан яшириниб метрода ўтиргани акс этган видеолар тарқалмоқда. Воқеалар ривожида Киевнинг Днепровск туманида портлашлар содир бўлди.
Шаҳарнинг Голосеевский туманидаги нотурар жой биносига ракета келиб тушди. Ҳалок бўлган ва яраланганлар бор.
АҚШ Украинага Abrams танкларини юборишини маълум қилди бироқ бунинг учун бир йилдан кўпроқ вақт кетиши мумкин.
АҚШ президенти Жо Байден Украинага 31 та Abrams танки етказилишини маълум қилди. Бу ҳақда NBC news хабар берди.
Байденнинг сўзларига кўра, етказиб бериш кўп вақт талаб этади, бироқ АҚШ тез орада вақтдан унумли фойдаланиш учун украиналик ҳарбийларни ўқитишни бошлайди.
25 январь куни АҚШ ҳукумати Киевга 31 та М1 Abrams танкларини топширишини маълум қилди. Ўз навбатида, Германия ҳукумати ҳам Украинага Германия қуролли кучлари захирасидан 14 та Леопард 2 танкини жўнатиши ва бошқа давлатларга реекспорт учун рухсат беришини тасдиқлади.
Америка ОАВларининг ёзишича: “Танклар Украина учун махсус General Dynamics томонидан ишлаб чиқарилиши сабабли уларни етказиб бериш бир йилдан кўпроққа кечиктирилиши мумкин”.
Германия бошқа давлатларга танк етказиши учун реэкспорт ҳуқуқини беради аммо Украинага фақат танкларнинг ўзи камлик қилади
Айни вазиятда Украина танклар масаласи ҳал бўлганидан сўнг Ғарбдан ракета ва самолётлар олишни режалаштирмоқда. Бу ҳақда Владимир Зеленский видеомурожаатда маълум қилди. Қолаверса, Президент офиси маслаҳатчиси Михаил Подоляк бу урушда Украина Қуролли кучлари 1991 йилдаги Украина чегараларида тўхташини ва жараённи тезлаштириш учун Украинага кўпроқ қуроллар кераклигини айтди.
Ўзбекистонда тендердаги шубҳали ҳолат аниқланди, журналист суриштируви
20 январь куни “Дарё” интернет-нашрида автомобилларга фара ва чироқлар ишлаб чиқаришга ихтисослашган Uz Chasys МЧЖ ўтказган тендер шубҳали экани, рақобатчилар қариндош бўлиши мумкинлиги ҳақида материал эълон қилинганди. Айни пайтда Uz Chasys корхонаси таҳририятга хат йўллаб, тендер юзасидан тузилган шартнома бекор қилинганини маълум қилди.
Божхона терминалларидан келиб тушган юкларни олиб тушиш, кўтариш хизматини бажариш бўйича бошланғич қиймати 474 миллион сўм бўлган тендерда иккита тадбиркорлик субъекти иштирок этганди.
Ғолиб корхона манзили Андижон вилояти Жалолқудуқ тумани Жалолқудуқ шаҳарчаси, Намуна кўчаси деб кўрсатилган. Раҳбар — Исманов Нуриддин Ғуломжанович. Таъсисчи эса Исманов Мухиддин Ғуломжанович.
Мағлуб МЧЖ And Cargo Trans Service’нинг раҳбари бошқа — Кимсанбоев Давронбек Иброхимжонович. Аммо манзили Андижон вилояти Жалолқудуқ туманида деб кўрсатилган корхонанинг таъсисчиси Исманова Фатмахон Игембердиевна. Мақолада Исманов Мухиддин ва Исманова Фатма қариндош бўлиб чиқиши эҳтимоли ҳақида сўз борган.
Uz Chasys тақдим этган баённомага кўра, танлов натижаси шубҳали бўлгани сабабли икки иштирокчидан қўшимча ҳужжатлар тақдим этиш сўралган. Рад жавоби олингач, текширув ва суриштирув ишлари олиб борилган.
Натижада таъсисчилар ва уларнинг устав фондидаги улуши ҳақида маълумотларига кўра бир оилага тегишли бўлган Исманов Мухиддин Гуламжанович ва Исманова Фатмахон Игембердиевна 100 фоиз улуш билан афилланган шахслар экани ва “Давлат харидлари тўғрисида”ги қонуннинг 14-моддасида (манфаатлар тўқнашуви) кўрсатилган қонун бузилишига олиб келиши аниқланган.
“Шуни айтиб ўтиш керакки, икки корхона ва тендер комиссияси аъзоларининг ҳеч қандай боғлиқлик томонлари мавжуд эмас”, — дейилади баённомада.
Охир-оқибат иштирокчилар ушбу тендерни қабул қилмаслигини ва танловни рад этишини маълум қилган. МЧЖлар раҳбарлари тақдим этилган нархлардан воз кечиб, тендерни бекор қилишга ўзаро келишиб олган.
Изоҳ (0)