“Урушга аралашиш”: Кремль Украинага танклар етказиб берилишига муносабат билдирди

Россия президенти матбуот котиби Дмитрий Песков Ғарб давлатлари Украинага техникалар етказиб беришига муносабат билдирди. Бу ҳақда “РБК” хабар берди.

“Европа пойтахтлари ва Вашингтондан Украинага турли хил қурол тизимлари, жумладан, танклар юборилиши ҳеч қандай ҳолатда бу давлатлар ёки НАТОнинг Украинадаги жанговар ҳаракатларга аралашишини англатмайди, деган баёнотлар эшитилади. Биз бу фикрга мутлақо қўшилмаймиз", — деди Песков.

Унинг сўзларига кўра, Москва бундай ҳаракатларни “можарога бевосита аралашиш” сифатида қабул қилади.

“НАТО ҳам, Европа давлатлари ҳам қилаётган барча ишлар тўқнашувга бевосита алоқадорлик сифатида қабул қилинмоқда, биз унинг кучайиб бораётганини кўрмоқдамиз”, деди матбуот котиби.

Песков, шунингдек, Кремль Киевга танклар етказиб берилиши билан боғлиқ “махсус операция” мақомини ўзгартириш масаласини кўриб чиқмаётганига ҳам аниқлик киритди.

“Бизнинг кун тартибимизда бундай мавзу йўқ”, — дея хулоса қилди Кремль матбуот котиби.

25 январь куни Германия Украинага Леопард 2 танкларини жўнатишга рози бўлди. Германия ҳукумати вакили Штеффен Ҳебестрайтнинг сўзларига кўра, Украина 14 та Леопард 2 А6 танкини олади. Германия бошқа мамлакатлардан танклар Киевга берилишини ҳам маъқуллайди. Бу қарордан сўнг АҚШ президенти Жо Байден Украинага 31 та Abrams танкини етказиб беришини маълум қилди.

Танкларнинг етказиб берилиши Россия расмийларининг танқидига сабаб бўлди. Хусусан, ушбу қарор фонида Қримдан Давлат думаси депутати Михаил Шеремет махсус ҳарбий операция мақомини ўзгартиришни таклиф қилди. Венадаги музокаралардаги Россия делегацияси раҳбари Константин Гавриловнинг қайд этишича, танклар етказиб бериш Москвани Россия ”махсус операцияси” мақсадларидан воз кечишга мажбурламайди, фақат чегараларини кенгайтиради.