Исроил кучлари 9 нафар фаластинликни, жумладан, кекса аёлни отиб ўлдирди

Исроил кучлари босиб олинган Ғарбий Соҳилда камида тўққиз нафар фаластинликни ўлдирди. Бу ҳақда Al Jazeera хабар берди.

Маълум қилинишича, Женин қочқинлар лагерига уюштирилган босқинда яна 20 киши ўқдан яраланган. Фаластин расмийларига кўра, ҳалок бўлганлар орасида кекса аёл ҳам бор. Жароҳат олган тўрт кишининг аҳволи эса оғир. Исроил кучлари ҳозир Жениндан чекинган.

Женин касалхонаси ҳалок бўлган аёл Магда Обайд эканини аниқлаган, Исроил ҳарбийлари унинг ўлими ҳақидаги хабарларни ўрганмоқда. Фаластин соғлиқни сақлаш расмийлари жароҳатланганлар шифохонага келишда давом этаётгани, Исроил кучлари эса тез ёрдам машиналари ва шифокорлар ишига тўсқинлик қилаётганини таъкидлади.

“Тез ёрдам ҳайдовчиси жароҳати билан ерда ётган одамнинг олдига боришга ҳаракат қилди, аммо Исроил кучлари тез ёрдам машинасига ўқ узиб, уларга тўсқинлик қилди”, — дейди Женин давлат касалхонаси раҳбари Виссам Бейкер.

Исроил кучлари касалхонага кўздан ёш оқизувчи газ отган, у болалар бўлимига сизиб кириб, уларнинг бўғилишига сабаб бўлган.

Фаластин бош вазири Муҳаммад Штайеҳ БМТ ва барча халқаро инсон ҳуқуқлари ташкилотларини “Фаластин халқини ҳимоя қилиш ва қон тўкилишини тўхтатиш учун зудлик билан аралашишга” чақирган баёнотни берган. Ғазо секторини бошқараётган HAMAS ҳаракати етакчиси Солиҳ ал-Арурий қаршиликларнинг жавоби кечиктирилмаслигини қайд этган.