Ўзбекистон банкларида рақобат даражаси қандай?

Прогнозлаштириш ва макроиқтисодий тадқиқотлар институти экспертлари Ўзбекистон банк тизимида рақобат даражасини таҳлил қилди.

Мазкур тадқиқотда Herfindal-Hirshman индексидан (HHI) фойдаланилди. Herfindal-Hirshman индекси бозор концентрациясининг умумқабул қилинган ўлчовларидан бириидир ва бозор рақобатбардошлигини аниқлаш учун ишлатилади. HHI 1 500 дан паст бўлган бозор рақобатбардош бозор ҳисобланади, HHI 1 500 дан 2 500 гача бўлган бозор ўртача концентрацияланган ва HHI 2 500 ёки ундан юқори бўлган бозор юқори даражада концентрацияланган бўлади.

Сўнгги 5 йилда Ўзбекистон банк тизимида рақобат активлар бўйича ҳам, кредитлар бўйича ҳам, депозитлар бўйича ҳам ортиб бормоқда. 

2018 йил 1 январь ҳолатига кўра активлар бўйича HHI индекси 1 520 бўлган бўлса, 2022 йил 1 декабрда эса бу кўрсаткич 1 016 гача пасайди. Кредитлар бўйича ушбу кўрсаткич 1 709 дан 1 082 гача тушди. 

Депозитлар бозорида бозор иқтисодиёти тамойилларига асосан фаолият олиб борилиши сабабли банклар ўртасида депозитлар учун кучли кураш мавжуд ва бу кураш йилдан йилга ортиб бормоқда. Ушбу тенденция депозитлар бўйича HHI индексининг 919 дан 852 гача тушганида ҳам яққол намоён бўлмоқда. 

Активлар 

Давлат улуши мавжуд энг йирик топ-5 банкларнинг (“Ўзмиллий банк”, “Саноатқурилишбанк”, Асака банк, Ипотека банк, Agrobank) банк тизими активларидаги улуши 70,9 фоиздан 60,5 фоизгача камайди. 

Давлат улуши мавжуд бошқа банклар улуши 11 фоиздан 18 фоизгача ошган бўлса, хусусий банклар улуши 18,1 фоиздан 21,5 фоизгача кўпайди. 

2025 йилга бориб, банк тизими активларининг умумий ҳажмида давлат улуши бўлмаган банклар активлари улушини 60 фоизгача ошириш режалаштирилган.

Мазкур даврда банк тизимига Тенге банк, TBC банк, “Anorbank”, Uzum (Apelsin) банк ва Пойтахт банк кириб келди. Ушбу банкларнинг жами активлардаги улуши 1,8 фоизга етди.  

Кредитлар 

Топ-5 банкларнинг жами кредит портфелидаги улуши 77 фоиздан 64 фоизгача камайди. Хусусий банклар улуши 11,6 фоиздан 16,6 фоизгача кўпайган бўлса, давлат улуши мавжуд бошқа банклар улуши 19 фоизга етди. Хусусий банклардан “Kapitalbank”, “Hamkorbank”, Ипак йўли банк кредитлар бозорида давлат улуши мавжуд банклар учун ҳам, бошқа хусусий банклар учун ҳам жиддий рақобатчига айланди. 

“Kapitalbank”нинг жами кредит портфелидаги улуши 1,2 фоиздан 3,8 фоизгача ошган бўлса, Ипак йўли банки улуши 1,8 фоиздан 2,1 фоизга кўпайди. “Hamkorbank” эса бозордаги 3 фоизлик улушини сақлаб келмоқда. 

Депозитлар 

2018 йилнинг бошида топ-5 банклар банк тизимидаги жами депозитларнинг 51,2 фоизга эгалик қилган бўлса, 2022 йил 1 декабрь ҳолатига келиб уларнинг улуши 46,9 фоизгача қисқарди. 

Хусусий банклар томонидан жалб қилинган депозитлар улуши 34,1 фоиздан 36,4 фоизгача кўпайди. Давлат улуши мавжуд бошқа банкларнинг депозит бозоридаги улуши 2 фоиз бандга — 14,7 фоиздан 16,7 фоизгача ошди.

Депозитлар бозорида давлат улуши мавжуд банклар ва хусусий банклар ўртасидаги рақобатдан кўра хусусий банклар ўртасидаги ўзаро рақобат кучлироқ ҳисобланади. 

“ЎзКДБ банк”нинг ушбу бозордаги улуши 8,6 фоиздан 3,6 фоизгача камайган бўлса, “Kapitalbank” ўз улушини 4,8 фоиздан 10,9 фоизга етказиб олди. “Hamkorbank” депозитлари улуши 5,5 фоиздан 3 фоизгача камайди.

Депозитлар учун рақобатнинг кучайиши муддатли депозитлар бўйича фоиз ставкаларининг жозибадорлигида ҳам ўз аксини топади. 

Масалан, 2017 йилнинг апрель ойида компанияларнинг муддатли депозитлари бўйича ўртача фоиз ставкаси 5,8 фоизни ташкил этган бўлса, 2017 йилнинг декабрь ойига келиб 12,1 фоизгача кўтарилди. 2022 йилнинг декабрь ойида эса 16,9 фоизга етди. 

Жисмоний шахсларнинг муддатли депозитлари бўйича ўртача ставка эса сўнгги 2 йилда 20 фоизни ташкил этиб келмоқда.