Украина президенти Владимир Зеленский сафарбарлик ва ҳарбий ҳолат пайтида давлат хизматчиларига мамлакат ташқарисига фақат хизмат сафари билан чиқишга рухсат берувчи фармонни имзолади.
Зеленский урушнинг 334-куни якунлари бўйича йўллаган мурожаатида фармон ҳақида шундай деди:
“Миллий хавфсизлик ва мудофаа кенгашидаги мансабдор шахсларнинг хорижга чиқиши масаласида фундаментал қарор бор. Бу марказий ҳокимиятнинг барча мансабдор шахсларига, турли даражадаги маҳаллий ҳокимият органларига тегишли. Бу ҳуқуқ-тартибот идоралари ходимлари, халқ депутатлари, прокурорлар ва давлат учун, давлатда туриб ишлаши керак бўлган ҳар бир кишига тааллуқлидир.
Ҳозир дам олиш — давлат хизматидан бўш вақтда дам олиш бўлади. Энди мансабдор шахслар хорижга дам олиш ёки бошқа нодавлат мақсадларда чиқа олмайди. Беш кун ичида Вазирлар Маҳкамаси мансабдор шахсларнинг чегарадан ўтишига оид шундай тартибини ишлаб чиқиши керак, шунда чегарадан ўтишга фақат ҳақиқий хизмат сафари асос бўла олади”.
Фармонга кўра, мамлакатдан чиқишга тақиқ Украина Вазирлар Маҳкамаси аъзоларига, президент офиси раҳбарияти, Олий Рада депутатлари, судьялар, прокурорлар, Украина хавфсизлик хизмати раҳбарлари, Марказий сайлов комиссияси, Миллий хавфсизлик ва мудофаа кенгаши, Миллий банк раҳбарлари, шаҳар маъмуриятлари раҳбарларига нисбатан қўлланилади.
“Украинская правда” 23 январь куни Украина бош прокурори ўринбосари Алексий Симоненко истеъфога чиққани ҳақида хабар берганди. Маълум бўлишича, у лвовлик тадбиркор ва депутат Григорий Козловскийнинг машинасидан фойдаланиб, оиласи билан Испанияга таътилга чиқиб келган.
Изоҳ (0)