Болливуднинг таниқли актрисаси Приянка Чопра Британиянинг Vogue журнали февраль сонининг қаҳрамонига айланди. Кадрлардан бирида актриса қизи Мелти Мери билан кўриниш берди. Журналистлар билан суҳбатда актриса биринчи марта қизи ҳақида очиқ гапирди, деб ёзади People Talk.
Приянка Чопра ва унинг турмуш ўртоғи Ник Жонаснинг қизи суррогат онанинг ёрдами билан 28 ҳафталикда дунёга келган.
«У туғилганида мен ҳам операция хонасида эдим. У жуда митти, ҳатто қўлимдан ҳам кичикроқ эди, дейди Приянка ўз интервьюсида. — Мен реанимацияда ҳамширалар қандай ҳаракат қилаётганини кўрдим. Улар қўлдан келган барчасини қилди. Ник ва мен болани интубация (нафас йўли тўсилиб қолганда уланадиган махсус найча) қилганда иккаламиз ҳам ўша ерда турган эдик. Қандай қилиб улар интубация қилиш зарурлигини (унинг кичкина танасида) аниқлашганини билмайман. Биз ўша кунларни уни ҳали менинг, ҳали турмуш ўртоғимнинг кўксига қўйиб ўтказдик. У яшаб кетадими ёки йўқ, билмасдим».
Шунингдек, у фарзандли бўлиш учун суррогат онага мурожаат қилиш қарорини танқид қилганларга ҳам жавоб қайтарди. «Сиз мени билмайсиз, — дейди у жавобан. — Сиз нималарни бошдан кечирганимни хаёлингизга ҳам келтирмайсиз. Менинг ёки қизимнинг касаллик тарихини ошкор қилишни истамаслигим сизга сабаблар ўйлаб топиш ҳуқуқини бермайди».
Эслатиб ўтамиз, Приянка Чопра ва Ник Жонас олти ойлик муносабатлардан кейин 2018 йилда турмуш қурган. Уларнинг тўйи насроний ва ҳиндуийлар урф-одатларига кўра, Жодхпурдаги Bhawan Palace саройида ўтказилган.
Изоҳ (0)