1990 йилларда канадалик Брендан Фрэйзер энг таниқли актёрлардан бири бўлган. У «Мумиё» фильмидаги Рик O’Коннел роли билан кўпчиликнинг ёдида қолган. Сўнгра актёрнинг ҳаётида қора чизиқлар пайдо бўла бошлади. Орадан ўтган 30 йил давомида у кўплаб синовларга дуч келди. 2023 йилга келиб тўсиқларни енгиб ўтган актёр чинакамига катта курашда ғалаба қозонди ва миллионлаб одамларга илҳом бағишлади, деб ёзади The Voice Mag.

2022 йилда Голливуд режиссёри Даррен Аранофскийнинг Брендан Фрэйзер иштирокидаги «Кит» фильми намойиш этилди. Актёр учун бу сўнгги 10 йилдаги биринчи йирик лойиҳа ҳисобланади.

Фрэйзер 90 йилларда Голливуднинг таниқли актёрларидан бири бўлган. Аммо кейинчалик унинг ҳаётида кутилмаган воқеалар содир бўлди. Брендан зўравонлик қурбонига айланди, бу фонда ортиқча вазн йиғишни бошлади ва натижада актёрга бўлган талаб ва эътибор сусайди.

Актёрнинг кинога қайтиши қайсидир маънода кутилмаган ҳодиса бўлди. «Кит» фильмида Фрэйзер ўзининг руҳий ва жисмоний муаммоларига ғарқ бўлган 270 килограммли қаҳрамон ролини ижро этди. Брендан бу орқали ҳақиқий ҳаётда ҳам ўз дардини енгишга муваффақ бўлди ва бугунда яна ижод билан банд. Актёр таъсирланди, тортинди, аммо яна керак бўлиш имкониятидан мамнун.

2023 йил бошида Critics Choice Awards тақдирлаш маросими бўлиб ўтди, унда Фрэйзер «Кит» фильмидаги иштироки учун «Энг яхши актёр» номинацияси бўйича тақдирланди. Актёр саҳнага чиққач кўз ёшларини ютиб, қалбларни тўлқинлантириб юборувчи нутқ сўзлади:

«Мазкур ‘Кит’ фильми муҳаббат ҳақида. Покланиш ҳақида. Зулмат ичра нур топа олиш ҳақида. Мен ғафлатда қолдим, ҳеч бир из қолдирмай, нон ушоғи каби ғойиб бўлдим, лекин сиз, Даррен Аранофский, мени топдингиз. Барча энг яхши режиссёрлар сингари қайси томонга қараб ҳаракат қилишимни кўрсатдингиз. Агар сиз менинг фильмдаги қаҳрамоним — Чарли сингари ортиқча вазн билан курашаётган бўлсангиз ёки ўзингизни зулмат денгизига ғарқ бўлгандек ҳис қилсангиз, шуни билишингизни истайман: агар оёққа туришга ва ёруғлик томон интилишга куч топсангиз, демак, ҳаммаси яхши бўлади».