Bollivudning taniqli aktrisasi Priyanka Chopra Britaniyaning Vogue jurnali fevral sonining qahramoniga aylandi. Kadrlardan birida aktrisa qizi Melti Meri bilan ko‘rinish berdi. Jurnalistlar bilan suhbatda aktrisa birinchi marta qizi haqida ochiq gapirdi, deb yozadi People Talk.
Priyanka Chopra va uning turmush o‘rtog‘i Nik Jonasning qizi surrogat onaning yordami bilan 28 haftalikda dunyoga kelgan.
“U tug‘ilganida men ham operatsiya xonasida edim. U juda mitti, hatto qo‘limdan ham kichikroq edi, deydi Priyanka o‘z intervyusida. — Men reanimatsiyada hamshiralar qanday harakat qilayotganini ko‘rdim. Ular qo‘ldan kelgan barchasini qildi. Nik va men bolani intubatsiya (nafas yo‘li to‘silib qolganda ulanadigan maxsus naycha) qilganda ikkalamiz ham o‘sha yerda turgan edik. Qanday qilib ular intubatsiya qilish zarurligini (uning kichkina tanasida) aniqlashganini bilmayman. Biz o‘sha kunlarni uni hali mening, hali turmush o‘rtog‘imning ko‘ksiga qo‘yib o‘tkazdik. U yashab ketadimi yoki yo‘q, bilmasdim”.
Shuningdek, u farzandli bo‘lish uchun surrogat onaga murojaat qilish qarorini tanqid qilganlarga ham javob qaytardi. “Siz meni bilmaysiz, — deydi u javoban. — Siz nimalarni boshdan kechirganimni xayolingizga ham keltirmaysiz. Mening yoki qizimning kasallik tarixini oshkor qilishni istamasligim sizga sabablar o‘ylab topish huquqini bermaydi”.
Eslatib o‘tamiz, Priyanka Chopra va Nik Jonas olti oylik munosabatlardan keyin 2018-yilda turmush qurgan. Ularning to‘yi nasroniy va hinduiylar urf-odatlariga ko‘ra, Jodxpurdagi Bhawan Palace saroyida o‘tkazilgan.
Izoh (0)