Комедик ролларни маҳорат билан ижро этувчи актриса Зуҳра Солиева «Севимли» телеканалининг «Машҳурлар» кўрсатувига берган интервьюсида ҳаёти давомидаги зарбалар, болалиги ва турмуш ўртоғининг хиёнати, фарзандли бўлиш учун калтакларга чидагани, холаси — халқ ардоғидаги актриса Саида Раметова билан ораларига совуқчилик тушгани ҳақида гапириб берди.
«Яқин дўст, кўнглингизни хурсанд қила оладиган инсон топиш жуда қийин»
Ҳаётимда битта нарсада — шахсий ҳаётимни тиклашда умидсиз бўлиб қолганман. Уни тиклашнинг иложи йўқ, хоҳишим ҳам йўқ. Умидни синдирганларидан кейин уни қайта тиклаш жуда қийин бўлади. Ҳозир ким биландир дўст бўлсангиз, бу охиригача менинг дўстим бўлиб қолади, дея олмайсиз. Агар инсон шунақа яқин топса, йўқотмасликка ҳаракат қилиши керак. Яқин дўст, кўнглингизни хурсанд қила оладиган инсон топиш жуда қийин.
«Айбим аёл киши эканимни фақат ўзим билганим бўлган»
Яқинда бир воқеага дуч келдим. Жабрланган, меҳнат қилган, натижада айбдор ҳам ўзим бўлдим. Уялмасдан эркак киши бўлиб мени айтмаган гапларимга айбдор қилганларга учрадим. Жуда дилим оғриди. Бундан олдин ҳаётимда жуда кўп зарбалар еганман, ўзимга нисбатан айтилган хунук гапларни, дилозорликларни кўрганманки, бу у даражалик оғир бўлмади. Турмуш қурганимда ҳам шу нарсага дуч келдим. Айбим аёл киши эканимни фақат ўзим билганим бўлган. Шундан кейин қўлимни силтаб қўйдим. Дунёдаги ҳар бир аёл умрини охиригача аёллигини ҳис қилсин. Турмуш ўртоғи у билан жанжал қилганда ҳам аёллигини билиб турсин.
«Холам Саида Раметовага ҳавас қилиб актрисаликни танлаганмиз»
Оила еттита фарзанд бўлганмиз, раҳматли Фотимадан кейин олтита қолдик. Биринчи январда Фотимамни йўқотганимга йигирма уч йил бўлди. Оилада жуда эрка бўлганман, катта фарзанд бўлганим учун отам ҳам жуда эркалатган. Ҳамма орзуларимни ушалтирадиган оилада катта бўлганман. Бизнинг оиламизнинг энг асосий қонуни бировнинг дилини оғритмаслик бўлган. Холам Саида Раметовага ҳавас қилиб актрисаликни танлаганмиз. Бизнинг оиламиздаги кўпчиликда санъатга мойиллик бор.
Онам бир хил услубда бўлса ҳам яхши доира чалади. Биринчи январда шундай можаролар бўлганида, дилимни оғритишганда уйда баланд овозда бақириб, Фотима ўлмаганида шундай бўлмасди, бундай инсонларга учрамас эдим, деб йиғладим. Икки йил олдингидек йиғлоқи эмасман. Мени йиғлатадиган нарсалар қайта рўй берса, кўзимга ёш ҳам келмайди. Ҳозирги кунда фақат Фотимани эсласам, кўзимга ёш келади. Агар йиғласам Фотима тушимга киради.
«Саида опам билан муносабатларимиз унча ёмон эмас, ёмон ҳам бўлгани йўқ»
Саида опам «Бу менинг жияним, тўғри келмаса ҳам ролга олишингиз керак», деб гапирмайди. Бу нарсани бошқалар кўргандир, аммо мен кўрмаганман. Улар жуда оптимист инсон, мени олийгоҳга олиб борганларида, «Бу кириши керак, мени жияним», демаган. Саида опам: «Тўғри келса олинг, тўғри келмаса олманглар», — деб айтган. Фотимам вафот этгандан олти ой ўтиб мен олийгоҳга келганман. Агар шунақа бўлганида, мен Миллий театрда саккиз йил штатсиз ишламас эдим, Саида опам улар берган ролларни уддасидан чиқиб ўйнай олсам штатга олишларини айтган.
Улар билан муносабатларимиз унча ёмон эмас, ёмон ҳам бўлгани йўқ. Фақат уйдаги майда гап-сўзлар сабаб узилиш бўлди. Бир-биримизни кўрсак, юзимизни тескари қилиш ҳолати бўлмади. Бизнинг оиламизда қариндошчилик деган нарса катта аҳамиятга эга. Ҳеч нарса қариндошларни бир-биридан айира олмайди. Ҳаммамиз гуноҳкормиз, хато қиламиз.
«Турмуш ўртоғимга бола, оила керак эмас экан, мен шунга тўрт йил чидадим»
Ҳар бир аёлнинг орзуси она бўлиш. Ҳаёт бу орзум армон бўлиб қолишига мажбур қилди. Тўрт йил фарзандим бўлиши учун турмуш ўртоғимнинг калтаклашига, хиёнат қилишига, хўрлашига сабр қилганман. Унга ўзидан бошқа ҳеч нарса керак эмас, ўз дунёси бор. Турмуш ўртоғимга бола, оила керак эмас экан, мен шунга тўрт йил чидадим. Имкон беришим билан дилимни оғритишди. Ҳозир ёлғиз бўлсам ҳам, дилим оғримасин дейман. Ҳамма бир хил эмас-ку, дейишади, аммо бир хил эмасликларини исботлай оладиган эркак ҳали йўқ.
Мавзуга доир:
- Зуҳра Солиева салкам 60 килога озишига ёрдам берган операция учун уйини сотгани ҳақидаги миш-мишларга изоҳ берди (видео).
- Instagram: Имроннинг Дурдонасиз ишланган навбатдаги клипи, Фарҳод учун рафиқасининг сюрпризи, қўшиқ айта бошлаган Зуҳра Солиева.
- «Мана сенга бола, деб ичимга тепарди». Зуҳра Солиева турмуш ўртоғи томонидан мунтазам калтаклангани ҳақида сўзлаб берди (видео).
Изоҳ (0)