Жаҳон банки президенти Дэвид Малпасс 2023—2024 йилларда жаҳон иқтисодиётининг паст ўсиш суръатларини прогноз қилди. Бу ҳақда Bloomberg хабар бермоқда.
Унинг сўзларига кўра, бу, асосан, инфляциянинг сақланиб қолиши ва инвестицияларнинг қисқариши ҳисобига содир бўлади. Иқтисодий тикланиш эса икки йилдан кейин содир бўлади.
«Ўйлашимча, бу узоқ давом этадиган секинлашув даври бўлади. Сабаби инфляциянинг сақланиб қолиши, янги инвестициялар ҳажмининг қисқариши аллақачон содир бўлмоқда, агар бир-икки йил олдинга назар ташласангиз, сезиларли тикланишни кўриш қийин. Иқтисодий ривожланишнинг бу секинлашуви 2023—2024 йилларда кузатилади, шекилли, — дейди Дэвид Малпасс SkyNews’га берган интервьюсида.
Январь ойи бошида Жаҳон банки глобал ялпи ички маҳсулот ўсиши прогнозини 1,7 фоизгача пасайтирди. Ташкилот иқтисодиётдаги ҳар қандай салбий ҳодиса рецессияни келтириб чиқариши мумкинлигини таъкидлаган.
Жаҳон иқтисодий форуми экспертлари бу йилги глобал рецессияни олдиндан прогноз қилган эди. Мутахассислар нафақат АҚШ ва Европа Иттифоқида, балки Хитойда ҳам заиф иқтисодий ўсишни кутмоқда.
Халқаро валюта жамғармаси 2023 йилда Европа Иттифоқи мамлакатлари ярмининг иқтисодиёти Россия ва Украина ўртасидаги уруш туфайли рецессияга юз тутишини айтмоқда.
Аввалроқ Ўзбекистоннинг иқтисодиёти биринчи чоракда пасайиши кутилаётгани ҳақида хабар берилганди.
Изоҳ (0)