O‘zbekiston iqtisodiyotining o‘sishi bo‘yicha prognoz e’lon qilindi. Bu haqda “Daryo”ga Iqtisodiy tadqiqotlar va islohotlar markazi xabar berdi.
2023-yilning birinchi choragi uchun mamlakat yalpi ichki mahsulotining (YIM) dastlabki bahosi taqdim etildi. Iqtisodiyot birinchi chorakda biroz pasayishi kutilmoqda. Birinchi chorakda O‘zbekistonning iqtisodiy o‘sishi odatda mavsumiy omillar tufayli past bo‘ladi.
2022-yilning to‘rtinchi choragida YIMning haftalik o‘sish tendensiyasi davom etdi, bu o‘tgan yilning uchinchi choragida ham kuzatildi.
O‘sish tendensiyasi asosan tashqi savdo va xizmat ko‘rsatish sohasidagi ishbilarmonlik faolligining sezilarli darajada oshishi bilan bog‘liq bo‘ldi. Xususan, 2022-yil davomida tovar va xizmatlarning tashqi savdo aylanmasi 18,6 foizga oshdi.
O‘tgan yilning oktabr va noyabr oylarida sanoat, ichki savdo va xizmat ko‘rsatish sohalaridagi faollik ham sezilarli darajada oshdi.
Bu Google qidiruv so‘rovlarida “Biznes va sanoat” toifalari bo‘yicha qidiruvlarining — 15,7 foizga, “Xarid qilish” — 17 foizga va “Dam olish va o‘yin-kulgi” — 10 foizga oshishida namoyon bo‘ldi.
O‘zbekiston yalpi ichki mahsulotining prognoz qilinayotgan haftalik o‘sishi (2022-yil va 2023-yil 1-choragi)
2022-yil avgust va oktabr oylarida O‘zbekiston iqtisodiyotining o‘sishi mos ravishda 5,81 foiz va 5,77 foiz darajasida prognoz qilingan edi.
Shu bilan birga, 2022-yilda O‘zbekistonning iqtisodiy o‘sishi 5,67 foizdan 5,87 foizgacha bo‘lgan diapazonda prognoz qilingan edi.
Umuman olganda, o‘tgan yili tashqi va ichki qiyinchiliklarga qaramay, O‘zbekiston iqtisodiyotida barqarorlik namoyon bo‘ldi.
Joriy yilda O‘zbekiston iqtisodiyoti rivojlanishda davom etadi. 2023-yilning birinchi choragida iqtisodiyotning yillik o‘sishi 5,47 foizni tashkil qilishi kutilmoqda.
Iqtisodiyotning biroz pasayishi sezilarli inflyatsiya bosimi va mavsumiy omillar bilan bog‘liq bo‘ladi. Yillik iqtisodiy o‘sishning prognoz diapazoni 2023-yilning birinchi choragi uchun 5,31—5,62 foiz darajasida belgilandi.
Avvalroq Jahon banki 2023-yil uchun global iqtisodiy o‘sish prognozini keskin pasaytirgani haqida xabar berilgandi.
Izoh (0)