ISW: Кремль Москвага мудофаа тизимларини ўрнатиш орқали россияликларга Украинадаги уруш қанчалик хавфлилигини кўрсатмоқчи бўлган

Американинг урушни тадқиқ қилиш институти (ISW) ўзининг кундалик хабарларида тахмин қилишича, Москвада пайдо бўлган ҳаво ҳужумига қарши мудофаа тизимлари Украинадаги урушни Россия учун хавф деб кўрсатиш ва россияликларни узоқ давом этадиган низога тайёрлашга қаратилган ахборот операцияси доирасида ўрнатилган бўлиши мумкин.

ISW экспертлари Кремлнинг Украина ҳарбийлари Москвага зарбалар беришига ишонишини даргумон деб ҳисоблайди. Уларнинг тахмин қилишича, мудофаа тизимлари айнан «провокацион» суратлар матбуотда эълон қилиниши учун, шу орқали эса россияликларни Украинадаги уруш улар учун бевосита хавф туғдиришига ишонтириш мақсадида ўрнатилган.

ISW ёзишича, бундан ташқари, бундай хатти-ҳаракатлар Россия ҳукуматининг Украинадаги уруштш Иккинчи жаҳон урушига қиёслашга уринишлари бўлиши ҳам мумкин. Яъни улар Украинани Россия учун, худди уруш йилларида Германия совет иттифоқига қандай хавф туғдирган бўлса, шундай реал хатарга эга мамлакат сифатида тасвирламоқчи. Шу тариқа, ҳукумат россияликлар орасида Украинадаги уруш тарафдорларини кўпайтириш ва уларни кейинги сафарбарликка тайёрлашни кўзда тутяпти, деб ҳисоблайди экспертлар.

Январь ўрталарида интернетда Москва марказидаги ҳаво ҳужумига қарши мудофаа тизимлари суратлари пайдо бўла бошлади. Хусусан, бундай тизимлардан бири Россия Мудофаа вазирлиги биноси томига ўрнатилган.

Россия ҳукумати ҳолатни изоҳлашдан бош тортмоқда: Кремль матбуот котиби Дмитрий Песков журналистларнинг саволларини Мудофаа вазирлигига қайта йўналтирган, Давлат думаси мудофаа қўмитаси аъзоси Евгений Лебедев эса эълон қилинган фото ва видеоларни «фейк» деб атади. Bloomberg агентлиги ўз манбаларига таяниб ёзишича, мудофаа тизимларининг ўрнатилиши Украина қуролли кучларининг Москвадаги нишонларга дронлар ёрдамида зарбалар бериш эҳтимоли бўйича хавотирлар фонида юз берган.

Декабрь бошида учувчисиз қурилмалар Рязань вилоятидаги Дягилево авиабазасига ва Саратов вилоятидаги Энгельс аэродромига ҳужум қилганди. Россия Мудофаа вазирлиги ҳодисада Украина қуролли кучларини айблаган. 6 декабрь куни эрталаб учар қурилма Курск вилоятидаги аэродромга зарба берган.