АҚШ Молия вазирлиги «Вагнер» хусусий ҳарбий компаниясини «трансмиллий жиноий ташкилот» деб тан олади. Шу муносабат билан келаси ҳафта ҳарбий компанияга ва бутун дунё бўйлаб унга алоқадор гуруҳларга қарши санкциялар кенгайтирилади. Бу ҳақда матбуот учун брифингда Оқ уй раиси Жон Кирби маълум қилди.
«Шу жумладан, жиддий жиноий фаолиятини давом эттираётгани туфайли, ‘Вагнер’ гуруҳи трансминтақавий хавф туғдиришини ушбу хатти-ҳаракатлар тасдиқлайди», — дея Reuters америкалик мансабдорнинг гапларини келтириб ўтди.
«Вагнер» асосчиси Евгений Пригожин Оқ уйнинг баёнотига ўз муносабатини билдирди. «Ва ниҳоят, энди ‘Вагнер’ ва америкаликлар — ҳамкасблар бўлди. Бундан буёғига ўзаро муносабатларимизни ‘жиноий уруғ-аймоқлар ўртасидаги можарo’ деб аташ мумкин», — деди бизнесмен.
«Вагнер» хусусий ҳарбий компанияси жангчилари расман Россия Мудофаа вазирлигига бўйсунмаган ҳолда, Украинадаги жанговар ҳаракатларда фаол иштирок этмоқда. Ёлланма жангчилар отрядлари Донбассда баъзи ҳарбий ютуқларга эришган. Гуруҳга кўнгиллиларнинг кўпчилиги Россия колонияларида ёлланмоқда, уларга ярим йил хизмат ўтаганидан кейин афв этилишларини ваъда қилишмоқда. Россияда жангчиларни ёллаш қонун билан тақиқланган, шунга қарамай, ҳукумат вагнерчилар эришган муваффақиятларни расман тан олишни бошлаган, Давлат думаси эса мамлакатда «Вагнер» фаолиятини қонунийлаштиришни таклиф қилмоқда.
«Вагнер» гуруҳи ўзи қандай гуруҳ?
Кўплаб Ғарб ОАВлари «Вагнер» гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.
«Конкорд» компанияси эгаси бўлган Евгений Пригожин 2016 йилдан буён АҚШ, 2020 йилдан буён эса Евроиттифоқ санкциялари остидадир. Вашингтонда у Интернет тадқиқотлари агентлиги (троллар фабрикаси) ва «Вагнер»ни назорат қилишда айбланган.
У «Вагнер»га алоқадорлигини кўп марта рад этган ва бундай айбловлар сабабли судлашган, аммо 2022 йил сентябрида у «Вагнер» асосчиси эканини маълум қилди. Ташкилотни 2014 йилда, унинг сўзларига кўра, «Донбассда рус халқига нисбатан геноцид» бошланган вақтда тузган.
Изоҳ (0)