Fransiya Yevropa va ukrainalik hamkorlari bilan birgalikda Rossiyaning Ukrainadagi “agressiv jinoyatlari” bo‘yicha maxsus tribunal yaratish ustida ish boshladi. Rossiya Tashqi ishlar vazirligi bunga munosabat bildirdi.
Munosabatga ko‘ra, Moskva Fransiyaning “Rossiya tomonidan bosqinchilik jinoyatlari bo‘yicha maxsus tribunal” tuzilgani haqidagi bayonotidan norozi.
“Biz Yevropa va Fransiya Tashqi ishlar vazirligining Rossiyaning bosqinchilik jinoyatlari uchun qandaydir maxsus tribunal yaratish rejalari haqidagi bayonotidan g‘azabdamiz. Biz inson huquqlarini himoya qilish masalasiga juda e'tiborli bo'lgan fransuz diplomatlaridan odamlarni ‘to‘g‘ri’ va ‘noto‘g‘ri’, ‘bizniki’ va ‘bizniki emas’ deb ajratmaslikni talab qilamiz. Fransiya tomonidan Ukrainaga yuborilgan advokatlar va kriminalistlar jamoasidan kamida bitta mutaxassis Ukraina qurolli kuchlari tomonidan o‘qqa tutilgan Rossiya hududlariga tashrif buyurish kerak. Parijga mustamlakachilik urushi, turli jazo operatsiyalari paytidagi o‘zining jinoyatlari uchun maxsus tribunal yaratishini tavsiya qilamiz”, deyiladi bayonotda.
30-noyabr kuni Yevrokomissiya rahbari Ursula fon der Lyayen Rossiyaning Ukrainadagi harakatlarini tekshirish uchun BMT ko‘magida maxsus tribunal tashkil etishni taklif qilgandi. Fon der Lyayenning so‘zlariga ko‘ra, Yevropa Ittifoqi turli davlatlardan yordam olish uchun xalqaro hamjamiyat bilan ishlashga tayyor.
Rossiyaning BMTdagi doimiy vakili Vasiliy Nebenzya tribunal tashabbusini “o‘z qonunbuzarligini yashirishga urinish” va “BMT nufuzi ortiga bekinish” deb atadi. Rossiyaning BMT Jeneva shtab-kvartirasidagi doimiy vakili Gennadiy Gatilovning ta’kidlashicha, tribunalni tashkil etish uchun bu tashabbus BMT Xavfsizlik Kengashida ma’qullanishi kerak.
Izoh (0)