Илон Маскнинг тескари даъволарига қарамай, Twitter’да ходимларни қисқартириш давом этмоқда

Илон Маск инкор этаётганига қарамай, Twitter’да ходимларни ишдан бўшатиш жараёни кучайиб бормоқда. Бу ҳақда Business Insider хабар берди.

Маълумотларга кўра, реклама ва монетизацияга масъул бўлган ўнлаб ходимлар икки ҳафта олдин компанияни тарк этишга мажбур бўлган. Ўтган ҳафта Сингапур ва Австралияда жойлашган офисларда ҳам ишдан бўшатиш ҳолатлари содир бўлган.

Бундан ташқари, яқин ҳафтада яна 50 нафар ходим компанияни тарк этади.

Маск Twitter’нинг АҚШдаги кўплаб халқаро ваколатхоналари ва унинг айрим бўлинмаларини ёпишни режалаштирмоқда. Бу эса компания ходимларининг 2000 кишигача қисқаришига олиб келиши мумкин. Бу сўнгги 10 йилдаги рекорд кўрсаткичдир.

Twitter бунга изоҳ беришдан бош тортди. Компанияга яқин манба Маскнинг ишдан бўшатишни тўхтатиш ҳақидаги ваъдаларини ҳақиқий баҳолаб бўлмаслигини таъкидлади, чунки у «ҳар дақиқада ўз вазиятига мос нарсани айтиши мумкин».

Илон Маск Twitter’ни сотиб олиш бўйича келишувни 27 октябрь куни якунлаб, компания учун 44 миллиард доллар тўлаган.

Шундан сўнг тадбиркор ижтимоий тармоқ ходимларининг ярмига яқинини ишдан бўшатди, қолганларни эса юқори интенсивлик билан ишлаш кераклиги ҳақида огоҳлантирди.

ОАВ хабарларига кўра, ушбу воқеалар фонида платформа фаолиятини сақлаб қолиш учун муҳим бўлган кўплаб ходимлар Twitter’ни тарк этган.