Санкциялар остидаги Россия бизнеси 1990 йилларни такрорламоқда — Bloomberg

Ғарб санкциялари Россия иқтисодиётига путур етказмади. Аммо чекловлар кўпчиликнинг мамлакатдан чиқиб кетишига қарамай, ёш россиялик тадбиркорларга кетган брендлар ва товарларни муваффақиятли алмаштириш имкониятини берди. Бу ҳақда Bloomberg маълумот берди.

Агентлик жорий даврни 1990 йиллардаги «эсдалик» билан қиёслайди. Ўша вақтда СССР парчаланиши таъминот занжирларида бўшлиқлар қолдириб, истеъмолчилар ва корхоналарни уларни тўлдиришнинг ижодий йўлларини топишга мажбур қилган.

Таъкидлашича, кўплаб Ғарб брендлари кетганидан сўнг, россиялик тадбиркорлар ўз бизнесларини сотиб олди ёки шунга ўхшаш муваффақиятли аналогларни яратди.

Масалан, Krispy Kreme донaтлари энди Krunchy Dream, Starbucks — Stars Coffee ва Pizza Hut — Pizza H.

Бундан ташқари, россияликлар Ғарбдан илгари етказиб берилган товарларни алмаштириб, янги логистика йўналишларини кашф қилмоқда.

Бунга Bloomberg 37 ёшли москвалик Виктория Шелановани мисол қилиб келтирди. Унинг синглиси Ғарб санкциялари киритилгандан сўнг вейкбординг учун керакли жиҳозларни топа олмаган.

Бу қизларни Хитойдан ишлаб чиқарувчиларни излашга ундади. Улар тез орада бир неча йирик Америка компаниялари учун спорт анжомларини ишлаб чиқарган завод билан келишувга эришди.

Bloomberg’нинг қайд этишича, Европа Иттифоқи қиймати 300 евродан ортиқ бўлган ҳашаматли товарларни экспорт қилишни тақиқлаганидан сўнг, Россияда дизайнерлик кийимлари ва аксессуарлари бозори «гуллаб-яшнамоқда». 2021 йилда россияликлар тахминан 7 миллиард еврога шахсий ҳашаматли буюмларни сотиб олган, бу жаҳон бозорининг 3 фоизини ташкил этади.

Bloomberg, шунингдек, «дўст мамлакатлар»да бўлганида Россия билан муваффақиятли иш олиб борган россиялик муҳожирлар ҳақида ёзади. Исмини ошкор қилмасликни сўраган россиялик тадбиркорлардан бири агентликка қандай қилиб Россия олтинини Дубайга импорт қилувчи бизнесни йўлга қўйгани ҳақида гапириб берди.

Бунда у 40 фоиз фойда олиб, тушган маблағни автомобиль қисмлари ёки бошқа жиҳозларни сотиб олишга сарфлайди ва кейинчалик Россияга экспорт қилади.

«Параллел импортнинг баъзи Ғарб ускуналарини алмаштиришдаги муваффақиятига қарамай, бу санкциялар зарар қилмайди дегани эмас», — деб ёзади Bloomberg.

Экспертларнинг фикрича, Россия иқтисодиёти савдо ва капитал оқимидаги тўсиқлар рақобатни бўғиб, самарасизликни оширганлиги сабабли секинлашишда давом этади.

Ҳисоб-китобларга кўра, ўтган йили Россия иқтисодиёти 2,7 фоизга қисқарган, 2023 йилда эса яна 2,5 фоизга қисқаради.