Нефть нархининг ошиши 18 январь кечқурун Халқаро энергия агентлиги (IEA) томонидан ёнилғига бўлган талабнинг ижобий прогнози туфайли давом этмоқда. Бу ҳақда «Интерфакс» хабар берди.
Лондоннинг ICE Futures биржасида Brent маркасининг март фьючерслари Тошкент вақти билан соат 20:40 га келиб бир баррель учун 87,33 долларни ташкил этиб, 1,41 долларга (1,64 фоиз) ошди.
Нью-Йорк товар биржасида WTI февраль фьючерслари котировкалари белгиланган вақтга келиб 1,69 долларга (2,11 фоиз) ошиб, бир баррель учун 81,87 долларга етди.
FactSet маълумотларига кўра, иккала бренднинг ҳам савдоси ўтган йилнинг 5 декабридан бери энг юқори даражани ташкил қилмоқда.
18 январь куни IEA 2023 йилда нефтга бўлган глобал талабнинг ўсиш прогнозини кунига 160 минг баррелга оширди.
Агентлик мутахассисларига кўра, жорий йилнинг иккинчи чорагида жаҳон талаби кунига 100,81 миллион баррелгача, учинчи чорагида 102,86 миллион баррелгача, тўртинчи чоракда эса 103,51 миллион баррелгача ўсади. Бу тарихий рекорд бўлиши кутилмоқда.
Агентлик шунингдек, ушбу ёнилғининг дунёдаги энг йирик импортчиси бўлган Хитойда нефтга бўлган талаб прогнозини суткалик 100 минг баррелга яхшилаган ҳолда 15,9 миллион баррелга етказди.
«Хитойда истеъмол талабининг қайтиши нефть бозори истиқболининг катта омилидир», — деди SPI Asset Management бошқарувчи ҳамкори Стивен Иннес.
Мавзуга доир: Россия Осиёга нефть етказиб бериш ҳажмини оширди — Reuters
Изоҳ (0)