«Толибон» ҳаракати генерали Мобинхон Муҳаммад ўзининг Twitter саҳифасида миллиардер Илон Маск Афғонистонда туғилганини маълум қилди.
Унинг сўзларига кўра, Илон Маск Афғонистоннинг Логар вилояти, Азар туманида таваллуд топган ва ҳозирда АҚШда қочқин сифатида яшамоқда. Ҳолат юзасидан ижтимоий тармоқ фойдаланувчилари Маскка мурожаат қилиб, твитга изоҳ билдиришни сўраган.
Мобинхон Муҳаммад Twitter’да расмий верификация белгисига эга, бироқ унинг «кўк галочка»си 18 январь куни олиб қўйилган. Эҳтимол, бунга Илон Маскнинг «келиб чиқиши» ҳақидаги твит сабаб бўлган бўлиши мумкин. «Толибон» вакиллари Twitter’да пулли верификация хизматига рўйхатдан ўтишни бошлаган, улардан баъзиларининг аккаунтларида «кўк галочка»лар пайдо бўлган. «Толибон»нинг икки расмийси ва Афғонистондаги ҳаракатнинг асосий тарафдорларидан тўрт нафари «галочка»лардан фойдаланмоқда.
Маълумот учун, миллиардер Илон Маск Жанубий Африканинг маъмурий пойтахти Преторияда туғилиб ўсган. У 17 ёшида Канадага кўчиб ўтган ва Кингстондаги Квинс университетида таҳсил олган. У 2 йилдан сўнг АҚШнинг Пенсильвания университетида ўқишни давом эттирган.
Изоҳ (0)