Японияда 13 ёшли қиз смартфон туфайли онасини пичоқлаб ўлдирди

Япониянинг Сидзуока префектурасида яшовчи ўн уч яшар қиз смартфон туфайли онасини ўлдириб қўйди. Бу ҳақда NHK телеканали хабар бермоқда.

Телеканал маълумотларига кўра, қотиллик 16 январь, душанбага ўтар кечаси содир бўлган. Оиланинг бошқа аъзолари қўнғироғи билан етиб келган полиция иккинчи қаватдаги ётоқхонада онани қонга беланган ҳолда топган. Кўп ўтмай аёл вафот этган. Гувоҳлар ҳодиса айбдори сифатида қизни кўрсатган, шундан сўнг ҳуқуқ-тартибот идоралари ходимлари уни сўроққа тутган. Қиз онасини ўлдирганини тан олган.

Бола 14 ёшга тўлмагани сабабли муаммоли ёки ёрдамга муҳтож оилалар фарзандлари билан ишлаш муассасасига жойлаштирилди. Сўроқ пайтида қиз смартфон туфайли онаси билан муаммолар бўлганини тан олди.

Полиция қайд этишича, қиз смартфон ишлатгани сабаб онаси билан жанжаллашиб қолган ва қасд олиш учун унинг ухлашини кутган. Аёлга бир неча марта пичоқ урилган — уйдан топилган қонли пичоқ ашёвий далил сифатида олинган.