Қирғизистон ҳукумати давлат амалдорларига бериладиган мукофот пулларини тежаш орқали Туркия дронларини сотиб олди. Бу ҳақда Sputnik хабар берди.
Қирғизистон президенти матбуот хизмати раҳбари Дайирбек Орунбеков бу бўйича маълумот берган. У 2022 йил охирида ҳеч қандай мукофот пули олмаган давлат хизматчилари мамлакат хавфсизлигини таъминлашга ҳисса қўшганини айтган.
«Бундан олдин Bayraktar, Aksungur, Akinji ва Аnka замонавий дронлари сотиб олинганди, улар аллақачон Қирғизистонга етказиб бериш жараёнида. Агар мамлакат ўз хавфсизлигини таъминлай олмаса, чораклик мукофотлар, давлат хизматчилари учун қўшимча тўловларнинг ҳеч бири арзимайди», — деди Орунбеков.
У айрим давлат хизматчиларининг қўшимча маошларнинг қисқартирилганидан норозилигини ўринсиз деб ҳисоблаб, уларга 2023 йил охирида маош берилишини ваъда қилмоқда. Орунбеков Тожикистон билан чегарадаги тўқнашувлардан сўнг Қирғизистон мамлакат мудофаа қобилиятини оширишга алоҳида эътибор қаратаётганини таъкидлади.
Қирғизистон Туркиянинг Аnka дронини ҳам харид қилган бўлиб, авиатехника 250 километргача масофани босиб ўтади, дрон ҳавода 30 соат туриши мумкин. Учиш оғирлиги 1,7 тонна бўлиб, 350 килограммгача юк кўтара олади.
Мавзуга доир: Қирғизистон президенти Германиядан сотиб олинган Airbus H145 вертолётини синовдан ўтказди (фото)
Изоҳ (0)