Қозоғистонда TikTok’даги ўйин туфайли болалар ўз жонига қасд қилаётгани ҳақида хабарлар тарқалди

Қозоғистонда ижтимоий тармоқлар орқали эркак қизи TikTok’даги ўйин туфайли ўз жонига қасд қилгани ҳақида гапирган аудио тарқалмоқда. Ҳолат юзасидан мамлакат Ички ишлар вазирлиги муносабат билдирди. Бу ҳақда Stopfake.kz хабар берди.

Эркакнинг сўзларига кўра, унинг қизи 12 январь куни зинада ўзини осиб ўлдирган. У қизининг ўз жонига қасд қилишига TikTok’даги ўйин сабаб бўлганини айтган. Эркак шу тариқа бошқа ота-оналарни фарзандларининг телефонларини текширишга чақирган.

Шунингдек, эркак Тараз шаҳрида икки нафар синфдош бола ҳам айнан шу сабаб билан ўз жонига қасд қилганини таъкидлади. Қозоғистон Ички ишлар вазирлиги ҳолат юзасидан муносабат билдириб, TikTok’даги ўйин туфайли уч бола ўз жонига қасд қилгани билан боғлиқ ҳолатни рад этди. «Мазкур маълумот тасдиқланмаган», — дейди ИИВ.

Аввалроқ Қирғизистон парламенти (Жогорку Кенеш) депутати Жанибек Қидиқбоев мамлакатда TikTok ижтимоий тармоғини блоклашни таклиф қилганди. У мазкур ижтимоий тармоқ болаларга салбий таъсир кўрсатаётганини қайд этган. У сўз исботи сифатида TikTok‘да наркомания, спиртли ичимлик реклама қилиниши, таналар ҳам кўрсатилишини қўшимча қилган.

Афғонистонда эса «Толибон» TikTok’дан фойдаланишни тақиқлаган. Бундан ташқари, ахлоқсиз мазмундаги канал ва кўрсатувлар фаолиятига чек қўйиш топширилган.