НАТО бош котиби Йенс Столтенберг немис ОАВларига берган интервьюсида яқин орада Украина оғир қуролларнинг навбатдаги партиясини олишини айтди, деб ёзади «Интерфакс».
«Оғир қуролларни етказиб бериш бўйича яқинда қабул қилинган мажбуриятларни амалга ошириш муҳим, тез орада янада кўпроқ таъминот кутилмоқда. Биз Украинага керакли қуролларни етказиб беришимиз зарур», — деди у.
Ўтган ҳафта бошида Германияда Украинага Леопард танкларини жўнатиш бўйича музокаралар кетаётгани ҳақида маълум бўлганди. Якуний қарор шу ҳафта ичида қабул қилиниши кутилмоқда. Бундан ташқари, Лондон Украинага Challengeр 2 танклари ва бир нечта Апаче вертолётларини топшириш режасини эълон қилган.
14 январь куни Украина президенти Владимир Зеленский офисининг раҳбари Андрей Ермак Украина ўз иттифоқдошларидан оғир қурол-яроғ қабул қилишни бошлаб юборгани ҳақида маълум қилди. Киев айнан қайси мамлакатлардан қандай қурол-яроғ олганига Ермак аниқлик киритмаган.
Изоҳ (0)