«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 14-сони мавзуси «Аёлнинг гапи — гап» бўлиб, дастур меҳмони сифатида журналист, «Анҳор» интернет нашри бош муҳаррири Лола Исломова таклиф этилди.
— Мен маҳаллада яшайман, маҳалланинг гапи секин-секин қулоққа етиб келади, аёллар билан гаплашаман. Ҳозир давлат томонидан ҳам аёллар учун кўп иш қилиняпти. Бир қўшним бор — икки фарзандли ёлғиз она — яқинда бир неча ойлик компьютер курсида бепул ўқиди, стипендия ҳам олди. Энди ҳисобчиликка ўқийман, деяпти. Аёлларга маҳалланинг ўзидан ҳам, фуқаролардан ҳам ёрдам келяпти.
Турмуш ўртоғи вафот этган бир қариндошим «темир дафтар»да экан, ёзда ҳокимиятдан, маҳалладан келиб ёрдам беришларини айтишган. Қўшалоқ тўй қилаётган эди, уйингизни таъмирлаб берамиз деб, ярим йилдан бери йўқ бўлиб кетишибди. Ҳозир ўзи буюртма учун овқат пиширяпти.
Атрофимдаги аёлларни кузацам, аксариятини 15–16–17 ёшида турмушга беришган. Маълумоти, касби, ҳунари йўқ, фарзандлари катта бўлиб қолган, ўзи ҳеч қаерда ишлолмайди. Лекин энди ўқиш, касб-ҳунар ўрганиш, турмуш ўртоғига ёрдам бериш кераклигини тушуняпти, қўлидан эса ҳеч нима келмайди.Маҳалладош аёллар билан «Кўрпача» деган лойиҳа қилдик. Биз учун кўрпача нима? Унда дунёга келамиз, унда сўнгги манзилимизга борамиз, овқатланамиз, фарзандли бўламиз, ҳаётимиздаги ҳар жараёнда кўрпача керак. Маҳалладаги аёллар билан ярим йил кўрпача тикканмиз, мен буюртма олиб келардим, улар тикиб, меҳнатларига ҳақ олишарди, ижтимоий тармоқларда оммалаштиришга ҳаракат қилардик. Менимча, ҳар бир маҳаллада шундай кичик маҳаллий бизнесларни йўлга қўйиш керак, — дейди «Анҳор» нашри бош муҳаррири.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)