Ўзбекистон халқ шоири Энахон Сиддиқова 13 январь куни 68 ёшида вафот этгани хабар қилинганди. Шавкат Мирзиёев марҳуманинг вафоти юзасидан таъзия билдирди.
«Ўзбек адабиёти ва маданияти оғир жудоликка учради», — деб бошланади ҳамдардлик хабари.
Энахон Сиддиқова 1954 йил 28 августда Фарғона вилоятининг Олтиариқ туманида туғилди. 1976 йилда Фарғона давлат педагогика институти (ҳозирги Фарғона давлат университети)нинг филология факультетини тамомлади.
Меҳнат фаолиятини 1976 йилда ўқитувчиликдан бошлаб, Олтиариқ ва Фарғона туманларидаги мактабларда ўзбек тили ва адабиёти фани ўқитувчиси, мактаб директори бўлиб ишлади. Қатор йиллар Фарғона тумани ва Фарғона вилояти ҳокимликларида масъул вазифаларда ишлаб, хотин-қизларнинг турмуш ва меҳнат шароитларини яхшилаш, оила, оналик ва болаликни ижтимоий ҳимоя қилиш, баркамол авлод тарбияси йўлида фаоллик кўрсатди.
Энахон Сиддиқова 2001 йилдан ҳозирги вақтга қадар Ўзбекистон Ёзувчилар уюшмасининг Фарғона вилояти бўлими раҳбари сифатида қизғин меҳнат қилди.
«У вилоятда адабиёт, маданият ва санъатни ривожлантириш, жойларда илм-фан ва китобхонликни кенг тарғиб қилиш орқали халқимиз маънавиятини юксалтириш борасида самарали хизмат қилди. Юзлаб ёшларга устозлик қилиб, уларнинг салоҳиятини рўёбга чиқаришда ташаббускор бўлди. Айниқса, Фарғона вилоятида Ўзбекистон Қаҳрамони, улуғ ўзбек шоири Эркин Воҳидов номидаги ижод мактабини ташкил этиш ва унинг фаолиятини йўлга қўйишда чинакам жонбозлик кўрсатиб хизмат қилди», — дейилади хабарда.
Таъкидланишича, Энахон Сиддиқова 2015 йилда Олий Мажлиси Сенатининг аъзоси сифатида мустақилликни мустаҳкамлаш, мамлакатда парламентаризм тизимини ривожлантириш, ижтимоий ва маънавий тараққиётимиз учун зарур бўлган муҳим қонунларни ишлаб чиқиш ва амалга оширишга катта ҳисса қўшган.
Марҳуманинг ўзбек адабиёти ва маданиятини ривожлантириш борасидаги хизматлари давлат томонидан тақдирланган. Унга «Ўзбекистон халқ шоири» фахрий унвони, «Эл-юрт ҳурмати» ва «Дўстлик» орденлари берилган.
«Таниқли ижодкор, меҳрибон устоз, самимий ва камтарин инсон Энахон Сиддиқованинг хотираси қалбларимизда ҳамиша сақланиб қолади», — деб ёзилади мактубда.
Изоҳ (0)