Саудия Арабистонининг Жидда шаҳрида 23 январдан 23 апрелгача Ислом санъати бўйича биринчи биеннале бўлиб ўтади.
Унда Ўзбекистоннинг 17 та экспонати намойиш этилади. Тадбир Дирий биеннале фонди ва Саудия Арабистони Маданият вазирлиги ҳамкоригида ташкил этилмоқда.
Биенналенинг бош мавзуси «Аввал байт» деб номланиб, у араб тилида «биринчи уй» деган маънони билдиради. Аввал Байт — Қуръони каримда келтирилган ибора бўлиб, у мусулмонларнинг энг муқаддас маскани – Маккадаги Каъбага нисбатан қўлланилади.
Ташкилотчиларнинг қайд этишича, тадбир анъаналарни сақлашни қўллаган ҳолда, инновацияларни илгари суради. Унда санъат соҳасидаги маънавий изланишлар унинг барча кўринишдаги бадиий ифода ва шаклларида тақдим этилади.
«Ислом санъати биенналесида Ўзбекистоннинг бебаҳо экспонатлари туркумини таништириш биз учун катта шараф. Юртимизнинг бой меросини халқаро ҳамжамиятга намойиш этиш ҳамда халқаро ҳамкорликни йўлга қўйиш Ўзбекистон Маданият ва санъатни ривожлантириш жамғармасининг муҳим вазифаси ҳисобланади. Биенналеда иштирок этиш — бу ишларни амалга ошириш учун ажойиб имкониятдир», — дейди Жамғарма кенгаши раиси ўринбосари Саида Мирзиёева.Жидда шаҳридаги кўргазмада Ўзбекистон маданий меросини акс эттирадиган 17 та экспонат намойиш этилади. Ислом оламининг энг муҳим қўлёзмаларидан бири бўлган VIII асрга оид Катталангар Қуръонининг бир неча саҳифаси, XVII асрга оид «Имом ал-Бухорийнинг Ал-Жоме’ ас-Сахих» ҳадислар тўплами, Самарқанд ва Афросиёбнинг Х-XII асрларга оид сопол кўза ва косалари, миллий либослар, пойабзаллар ва бошқа ноёб экспонатлар шулар жумласидандир.
Ўзбекистон Маданият ва санъатни ривожлантириш жамғармаси ижрочи директори Гаяне Умерованинг маълум қилишича, ислом санъати биенналеси билан боғлиқ лойиҳаларни намойиш этиш имконини берувчи муҳим халқаро тадбирдир. Ўзбекистон бой тарихга эга, ўтмишимизнинг аксарият қисми ислом анъаналари билан чамбарчас боғлиқ. Ўзбекистон томонидан намойиш этилаётган экспонатлар жаҳон ҳамжамиятини уларни ўрганишга бўлган қизиқишини оширишга қаратилган.
Биеннале доирасида жамғарма томонидан мамлакат маданий мероси билан таништиришга қаратилган кенг оммавий дастур ташкиллаштириш режалаштирилган. У мунозаралар, мусиқий чиқишлар, кино намойишлар ва амалий дарсларни ўз ичига олади. Шунингдек, анъанавий мусиқий асбоблари жўрлигида «Ўлим минораси»(1924) номли овозсиз фильми, «Ал-Бухорий» (1998) ҳам намойиш этилиб, кулолчилик, сўзана ва бошқа мавзулар бўйича маҳорат дарслари ва бошқа кўплаб тадбирлар ҳам ташкил этилади.
Изоҳ (0)