Ўзбекистон элчихонаси томонидан Корея Республикаси Қуролли кучлари Тиббиёт қўмондонлиги билан ташкил қилинган учрашув натижасида 2023 йилда мамлакат Мудофаа вазирлиги тиббиёт мутахассисларининг тиббий ёрдам кўрсатиш курсларида таҳсил олишлари бўйича келишувга эришилди, деб хабар бермоқда «Дунё» ахборот агентлиги.
Қайд этилишича, 2022 йилда Корея Республикаси Қуролли Кучлари Тиббиёт мактаби ушбу курслар ташкилотчиси сифатида халқаро аккредитациядан ўтганидан бошлаб Ўзбекистоннинг 12 нафар ҳарбий хизматчиси мазкур ўқув курсларида таълим олган дастлабки хорижий вакиллардан бўлган.
Ўқув машғулотлари якунида Ўзбекистоннинг барча ҳарбий хизматчилари Корея Республикаси Қуролли Кучлари комиссияси олдида амалий синовлардан муваффақиятли ўтган. Курснинг халқаро стандартлардан муваффақиятли ўтгани инобатга олиниб, Ўзбекистоннинг барча ҳарбий хизматчиларига тегишли халқаро сертификатлар берилган.
2023 йилда Ўзбекистон Мудофаа вазирлигининг яна 15 нафар тиббиёт мутахассиси ушбу курсларда малака ошириши кутилмоқда.
Шошилинч тиббий ёрдам курси АҚШ, Канада, Германия ва бошқа қуролли кучларда ўз самарасини кўрсатган АҚШ Мудофаа вазирлигининг жанговар жароҳатларни тактикавий бошқариш курсига қўшимча ҳисобланади.
Назарий ва амалий машғулотларга йўналтирилган мавжуд биринчи тиббий ёрдам курсларидан фарқли ўлароқ, бу курслар жанговар ҳаракатлар пайтида биринчи тиббий ёрдам кўрсатишни амалий жиҳатдан ўзлаштиришга, ярадорларнинг ҳаётини сақлаб қолиш учун жанг майдонида хавфсиз эвакуацияни ташкил этишга қаратилган.
Изоҳ (0)