Исроил армияси босиб олинган Шарқий Қуддусдаги қочқинлар лагерига рейд чоғида уйи томида турган фаластинлик эркакни ўлдирди. Бу ҳақда Al Jazeera хабар берди.
Марҳум 41 ёшли Самир Аслан бўлиб, тонг саҳарда қочқинлар лагерида кўкрагидан отиб ўлдирилган. Расмийларнинг Al Jazeera’га маълум қилишича, саккиз фарзанднинг отаси бўлган Аслан бошқа оила аъзолари билан уйининг томида босқинни томоша қилаётган пайтда исроиллик снайпер томонидан отиб ташланган.
У 17 ёшли ўғли Рамзи Исроил армияси томонидан уйидан ҳибсга олинганидан тахминан 10 дақиқа ўтиб ўлдирилган. Ҳибсга олингандан сўнг, «бутун оила баланд овозда қичқириқни эшитиб, нима бўлаётганини кўриш учун томга чиққан. Самир, унинг рафиқаси, учта қизи ва бир нечта ўғиллари уйда бўлганида исроиллик снайпер оилага қарата ўқ узган ва Самирни тўғридан-тўғри кўкрагига отган», — дейди лагерни бошқарадиган Фаластин маъмурияти расмийси Закария Файялеҳ.
Ўғиллари уни кўтариб, касалхонага олиб бормоқчи бўлган. Бироқ Исроил кучлари уларни тўхтатиб, Самирни ерга қўйдирган. У бир муддат, Исроил кучлари кетгунича қонга беланган ҳолда ётган. Касалхонага етиб боргач, оламдан ўтган.
Аҳоли ва маҳаллий оммавий ахборот воситалари томонидан тарқатилган, Al Jazeera томонидан тасдиқланган видеоларда Аслан исроиллик аскарлар қуршовида ерда ётганини кўриш мумкин.
«Самир менинг энг яқин дўстларимдан бири эди, у билан биродарлик муносабатида бўлганман», — деди Файялеҳ ва Асланнинг ал-Рам шаҳридаги қассоб дўконида ишлаганини қўшимча қилди.
У Исроил армиясининг Қаландия қочқинлар лагерига рейд уюштиргани мисли кўрилмаган бўлиб, буни «агрессив ва шиддатли ҳужум» деб таърифлаган.
«Улар кучлар сони, бостириб кирган уйлар сони бўйича биринчи марта лагерга шундай рейд уюштиришмоқда. Одамларнинг нарсаларини вайрон қилиб, ҳатто аёлларга ҳужум қилишган», — дея давом этди у ва снайперлар томларга жойлаштирилганини айтди.
Мавзуга доир:
Изоҳ (0)