Соледар ҳозир Украина ҳарбийлари назоратида бўлиб, шаҳар ташқарисида рус қўшинлари билан шиддатли жанглар кетмоқда. Украина мудофаа вазири ўринбосари Анна Маляр Соледарда содир бўлаётган воқеалар ҳақида гапирди.
«Бугун Бахмут йўналишидаги Соледар ҳудудида шиддатли ва энг оғир жанглар давом этмоқда. Мудофаамизни ёриб ўтиб, шаҳарни эгаллашга муваффақиятсиз уринган душман катта йўқотишларга учради», — деди Маляр.
Унинг сўзларига кўра, россиялик ҳарбийларнинг аксарияти ва Вагнер ёлланма аскарлари шаҳарга кира олмайди. Улар Соледар учун жангларда ҳалок бўлмоқда. Шаҳар яқинидаги ҳудудлар том маънода Россия ҳарбийлар жасади билан тўлиб-тошган.
Мудофаа вазири ўринбосарининг қўшимча қилишича, Россия ҳарбийлари ҳатто ҳалок бўлганларнинг жасадларини олиб чиқиш ва ярадорларни эвакуация қилишга ҳаракат ҳам қилмаяпти. Улар ўз ватандошларининг жасадлари устидан Соледарга киришга ҳаракат қилмоқда.
«Шаҳарда шиддатли жанглар кечмоқда. Соледарнинг қайси қисмини назорат қилаётганимиз ва душман қайси қисмни назорат қилишга уринаётганини фоизларда баҳолаш бироз ўринсиз. Жанглар давом этмоқда», — дейилади хабарда.
Соледар учун шиддатли жанглар кетаётгани ҳақидаги маълумотни Украина Миллий гвардияси бош бошқармаси вакили Николай Уршалович ҳам тасдиқлаган. У Соледар ҳудудида Украина миллий гвардиячилари оддий рус аскарлари, яқинда сафарбар қилинган руслар ва «Вагнер»нинг ёлланма аскарлари билан тўқнашаётганини айтди.
Соледарнинг Украина ҳудуди эканини Президент девонининг раҳбари Андрей Ермак ҳам ёзган. У украиналикларни рус тарғиботчиларининг Россия қуролли кучлари Бахмут ва Соледарни аллақачон қўлга олгани ҳақидаги сохта хабарларига ишонмасликка чақирган.
Мавзуга доир:
Изоҳ (0)