Беларуснинг «ГардСервис» хусусий хавфсизлик компанияси қошида, афтидан, Россиянинг «Вагнер» хусусий ҳарбий компанияси аналогини ташкил қилиш режалаштирилмоқда. Бу ҳақда Беларусь мухолифатчиси Светлана Тихановскаянинг мудофаа ва миллий хавфсизлик масалалари бўйича Бирлашган ўтиш вазирлар маҳкамаси аъзоси Валерий Сахашикка таяниб, Deutsche Welle хабар берди.
Сахашикнинг сўзларига кўра, сўнгги пайтларда «ГардСервис» ходимларининг сони сезиларли даражада ошган. У ҳозир компанияда мингдан ортиқ одам бўлиши мумкинлигини тахмин қилмоқда.
«Тайёргарлик ва ишга олиш бир неча ойдан бери давом этмоқда. Шахсий таркиб махсус операцияларда ва Беларусь ҳуқуқни муҳофаза қилиш органларининг махсус бўлинмаларида хизмат қилган офицерлар, посбонлар, сержантлар ва аскарлар ҳисобига кўпайтирилди», — деди у.
Deutsche Welle суҳбатдошининг сўзларига кўра, «ГардСервис» ходимлари Беларуснинг бир нечта полигонларида ўқитилмоқда. «5-махсус бўлинмалар бригадаси офицерлари ўзларининг полигонларида ‘ГардСервис’ ходимларини ўқитишаётганидан хабарим бор. Бундан ташқари, компания собиқ ‘Динамў махсус ўқув маркази базасини эгаллаган, у ерда ҳам фаол операциялар олиб борилмоқда», — деди манба.
Сахашикнинг фикрича, Россиянинг «Вагнер» гуруҳидан намуна олиб, «ГардСервис» ходимларидан саботаж-разведка гуруҳлари ва ҳужумлар учун фойдаланишлари мумкин.
2022 йилнинг ёзида Беларусь мустақил ОАВлари «ГардСервис»даги манбага таяниб, «Вагнер» ёлланма аскарлари Минскка Хусусий хавфсизлик ташкилоти ходимларини ўқитиш учун келганини ёзганди, деб эслатди DW.
«ГардСервис» хусусий хавфсизлик компанияси 2020 йил июнь ойида ташкил этилган. Александр Лукашенконинг фармонига кўра, ушбу хусусий хавфсизлик компанияси ходимларига «ҳарбийлаштирилган қўриқчилар учун қонун ҳужжатларида белгиланган тартибда» хизмат ва фуқаролик қуролларини, шунингдек, махсус воситалар ва жисмоний кучларни олиб юриш, сақлаш ва ишлатишга рухсат берилган. «ГардСервис» Беларусда ўқотар қуроллардан, жумладан, тўппонча, пулемёт ва снайпер милтиқларидан фойдаланиш ҳуқуқини олган ягона хусусий хавфсизлик компанияси ҳисобланади.
Ходимларига қурол ишлатишга рухсат берилган «ГаардСервис»нинг пайдо бўлиши 2020 йил август ойида Беларусда бўлиб ўтган президентлик сайловлари билан боғлиқ. Ўшанда Беларусь Марказий сайлов комиссияси Александр Лукашенкони сайлов ғолиби деб эълон қилган. Мухолифат эса натижалар сохталаштирилганини маълум қилган ва сайлов натижаларини тан олишдан бош тортган. Сўнг Беларусда норозилик намойишлари бошланган, улар шафқатсизларча бостирилган.
Изоҳ (0)