Бахмут учун кечаётган жанглар Украина қуролли кучларини ўз тактикасини қайта кўриб чиқишга мажбур қилди. Бу ҳақда The New York Times хабар берди.
Нашр муаллифларининг сўзларига кўра, аввалроқ Украина расмийлари катта йўқотишлар билан жанг қилиш мақсадга мувофиқлигига шубҳа қилган. Аммо Бахмут билан боғлиқ вазиятда улар ўз нуқтаи назарини ўзгартиришга мажбур бўлган. Ҳозирда бу шаҳарнинг мудофааси Украина учун рус ҳарбийларига қарши миллий курашнинг рамзига айланди.
Таҳлилчилар Бахмутдаги жанг ҳозир катта стратегик аҳамиятга эгалигини айтмоқда. Бу боши берк кўчага тушиб қолгани қуролли кучларни стратегиясини ўзгартиришга мажбур қилмоқда. Украина қўмондонлиги Россия томонидан белгилаб қўйилган янги воқеликларга, яъни фронтал ҳужумларга ўтадиган катта ҳажмдаги рус қўшинларига мослашиши керак.
Нашрда таъкидланишича, узоқ вақт давомида Украинага қарши урушда катта ютуққа эришмаган Россия учун Бахмутнинг қўлга олиниши катта психологик аҳамиятга эга.
«Россия томонидан сарфланган ўқ-дорилар миқдори ва улар кўрган йўқотишлар Россия армиясининг мағлубиятига олиб келди», — дейди таҳлилчи Роб Ли.
Илгари 100 мингга яқин аҳоли истиқомат қилган Бахмутда ҳозирда 7 мингга яқин одам ғарбий қисмда истиқомат қилмоқда. Шаҳарнинг шарқий кварталлари харобага айланган.
Бахмутдаги жанглар икки босқичда бўлиб ўтган: биринчи 100 кун ичида фақат рус армияси қатнашган, кейингисида эса «Вагнер» хусусий ҳарбий компанияси қўшилган. Иккинчи босқич янада қонли бўлган, чунки руслар шаҳарга бостириб кириш учун «Вагнер» сафига ёлланган маҳбусларни киритган. Уларнинг ортидан махсус ўқитилган ҳарбийлар бор эди. Шу тариқа «Вагнер» етакчиси Пригожин янги тактикани синаб кўрган.
Мавзуга доир: Британия разведкаси рус қўшинлари Бахмутни эгаллаши эҳтимолини баҳолади
Изоҳ (0)