Украина президенти Владимир Зеленский Олий рада депутати ва «Мухолифат платформаси — Ҳаёт учун» россияпараст партияси сиёсий кенгаши собиқ раҳбари Виктор Медведчукни Украина фуқаролигидан маҳрум қилди. Бу ҳақда Зеленский ўзининг кечки мурожаатида маълум қилди.
Бундан ташқари, яна уч нафар депутат — «Мухолифат платформаси — Ҳаёт учун» партиясидан Олий радага сайланган Тарас Козак ва Ренат Кузмин ҳамда Раданинг фракциядан ташқари депутати Андрей Деркач ҳам Украина фуқаролигидан чиқарилди.
Зеленский бу одамларни «Украина Хавфсизлик хизмати ва Давлат миграция хизмати томонидан тайёрланган материаллар асосида» фуқароликдан маҳрум қилганини айтди.
«Агар халқ томонидан сайланганлар Украина халқига эмас, Украинага келган қотилларга хизмат қилишни танласа, бизнинг хатти-ҳаракатларимиз ҳам шунга яраша бўлади», — деди Зеленский ва бу «шундай қарорларнинг сўнггиси эмаслиги»ни қўшиб қўйди.
«Мухолифат платформаси – ҳаёт учун» партияси раҳбари Виктор Медведчук россияпараст сиёсатчи сифатида танилган. ОАВ уни «Владимир Путиннинг қадрдони» деб атайди.
2021 йилда Украина ҳуқуқ-тартибот идоралари Медведчукка давлатга хиёнат ва «миллий бойликларни талон-тарож қилишга уриниш» бўйича иккита айблов қўйди. Медведчук уй қамоғига олинган, хабарларга кўра, у Россия Украинага бостириб кирган дастлабки кунларда қочиб кетган. 12 апрель куни Украина расмийлари Медведчук ҳибсга олингани ҳақида маълум қилди.
21 сентябрь куни асирлар билан айирбошлашув доирасида Киев Москвага сиёсатчи Виктор Медведчукни ва 55 нафар россиялик ҳарбийларни топширганди.
Медведчук 215 нафар украин ҳарбийлари, шу жумладан, Мариуполдаги «Азовсталь» заводи ҳимоячилари ва «Азов» полки қўмондонлигига алмаштирилган. Шунингдек, Украина томонида жанг қилиб, асирликка тушган ўн нафар чет эллик ҳам қайтарилган.
Мавзуга доир:
Изоҳ (0)