Бу, афсуски, ҳақиқат. Вақт ўтиши билан кир ювиш машинасидан моғор ҳиди кела бошлайди ва бу ювилган кийимларга ҳам ўз таъсирини ўтказади, деб ёзади «Новий очаг».
Кир ювиш машинаси вақтни, сувни ва электр энергиясини ҳам тежашга ёрдам беради. Аммо қурилманинг ҳам ўзига яраша камчиликлари бор. Уни бартараф этиш учун кир ювиш машинасини мунтазам равишда текшириб туриш лозим.
Нима учун кир ювиш машинасини тозалаш керак?
Кир ювиш кукуни ва кир барабаннинг деворларидан тўлиқ ювилмайди ва бу замбуруғ ва моғор пайдо бўлишига олиб келади. Кейинчалик ёқимсиз ҳидларни келтириб чиқаради. Баъзида ювилган ва тоза кўринган кийимларни кийиш ҳам имконсиз бўлиб қолади. Аммо ушбу муаммони бартараф этишга ёрдам берадиган усуллар мавжуд.
Сирка
Машинада ҳеч нарса йўқ бўлиши лозим. Барабан бўш бўлиши керак. Махсус диспенсерга 2 стакан тоза сирка қуйилади. Энг узоқ ювиш режими ва максимал ҳарорат ёқилади. Агар кир ювиш машинасида барабанни тозалаш дастури бўлса, уни танлаш мумкин. Сирка бактерияларни ўлдиради ва ҳидни йўқ қилади.
Оқартирувчи восита
Кир ювиш воситаси солинадиган бўлмага оқартирувчи восита қуйилади ва яна энг юқори ҳарорат ва ювиш режими ёқилади.
Чайиш режими
Машинада қолиши мумкин бўлган бактерия ва кукун қолдиқларини тўлиқ ювиш учун сувга ҳеч нарса қўшмасдан қўшимча чайиш режимини ёқиш тавсия этилади.
Кир ювиш кукуни солинадиган диспенсер
Диспенсер олинади, у илиқ сувга солиниб, бир неча томчи идиш ювиш воситаси қўшилади ва диспенсерни бир неча дақиқага намлаш учун қолдирилади.Шундан сўнг диспенсерни оддий губка билан ювиб, қуритишга қўйилади.
Барабан резинкаси
Барабан резинкаси диққат билан текшириб кўрилади. Одатда у ерда соч толалари, кир сув ва бошқа майда чиқиндилар тўпланиб қолади ва айнан шу туфайли ҳам ёқимсиз ҳид келади. Уни тозалаш учун сувга оқартирувчи восита қўшилиб, яхшилаб артиб олинади. Сўнгра қуруқ мато билан артилади.
Кир ювиш машинасидан қандай тартибда фойдаланиш керак?
- Ювилгандан кейин кирларни машинада узоқ вақт қолдирмаслик лозим.
- Ювиш жараёни тугагандан сўнг машина эшигини камида бир соат очиқ қолдириш тавсия этилади. Лекин ҳар доим ҳам эмас. Баъзи моделларда бу қурилманинг бузилишига олиб келади.
- Барабан эшиги резинасини қуруқ ва тоза сақлаш учун қоғоз салфетка билан тез-тез артиб олиш мумкин.
- Ҳар бир ювишдан кейин диспенсерни ювиш ва қуритиш тавсия этилади.
Изоҳ (0)