Xitoyning Shenchjen shahri va maxsus ma’muriy hudud maqomiga ega Gonkong o‘rtasidagi chegarada nazorat-o‘tkazish punktlari 8-yanvardan odatdagidek ish boshladi, deb xabar bermoqda Sinxua agentligi. Nazorat punktlarining ochilishi 2020-yilda COVID-19 avj olgandan so‘ng Gonkong va Xitoyning materik qismi o‘rtasida joriy etilgan harakatlanish cheklovlarini olib tashlash yo‘lidagi birinchi qadam bo‘ldi.
Birinchi bosqichda kuniga 60 ming Gonkong aholisi Xitoyga kirishi mumkin bo‘ladi. Ulardan 50 ming nafari Shenchjen bilan chegarada quruqlikdagi nazorat-o‘tkazish punktlaridan foydalana oladi, qolganlari esa parom, samolyotlar yoki Gonkong—Chjuxay—Makao ko‘prigi orqali “materik”ka o‘tadi.
O‘tkazish punktining ochilishida ishtirok etgan Gonkong ma’muriyati rahbari hammasi yaxshi o‘tganini aytib, rasmiylar Gonkong va “materik” o‘rtasidagi normal qatnovni to‘liq tiklash uchun umumiy reja ishlab chiqish niyatida ekanini ma’lum qildi.
Gonkongda o‘tgan sutka davomida mahalliy hokimiyat ma’lumotlariga ko‘ra, 15,3 mingdan ortiq odamda COVID-19 aniqlangan, bemorlar infeksiyani mintaqa ichida va tashqarisida yuqtirgan. Shu kuni Gonkongda COVID-19 bilan kasallanganlarning 72 nafari vafot etgan.
Xitoyda esa (Gonkong va Makaodan tashqari) 6-yanvar kuni 10,6 mingdan ortiq odamda COVID-19 infeksiyasi aniqlangan, uch kishi vafot etgan.
Izoh (0)