Наманган ва Андижон аэропортлари ноқулай об-ҳаво сабаб самолётларни қабул қилишни вақтинча тўхтатди

Наманган ва Андижон халқаро аэропортларида қуюқ туман туфайли кўришнинг ёмонлашиши самолётларни қабул қилиш ва жўнатишнинг вақтинча тўхтатилишига олиб келди. Бу ҳақда Uzbekistan Airports хабар қилди.

Хусусан, Наманганда кўриниш чегарасининг 700 метргача пасайиб кетиши сабабли Uzbekistan Airways авиакомпаниясининг HY9816/9821 (Оренбург—Наманган—Иркуцк) ва HY9822/94 (Иркуцк—Наманган—Тошкент) йўналишлари бўйича рейслари ўзгартирилган.

Air Arabia авиакомпаниясининг Г9784/785 (Шаржа—Наманган—Шаржа), шунингдек, Red Wings авиакомпаниясининг WZ4483/4484 (Москва—Наманган—Москва) рейси Тошкент халқаро аэропортидан амалга оширилади.

Ноқулай об-ҳаво шароити (кўриш масофаси 900 метр) Андижон аэропорти ишининг чекланишига ҳам сабаб бўлган. Uzbekistan Airways’нинг HY091 (Тошкент—Фарғона), HY049 (Фарғона—Самарқанд), HY050 (Самарқанд—Фарғона) ва HY092 (Фарғона—Тошкент) рейслари ўзгартирилган йўналиш бўйича амалга оширилади.

Ноқулай об-ҳаво туфайли Наманган ва Андижон аэропортлари вақти-вақти билан ўз ишини тўхтатиб, қайта тиклашга мажбур бўлмоқда», — дейилади хабарда.